ახალციხის ციხეში მაღაზიები დაიკეტა

”სვოჩი”, ”აქსესორაიზი”, ”ბენეტონი”, ”მექსსი”, ”პიერ კარდენი”, ”პუმა”, ”დიზელი” - ამ ბრენდების მაღაზიები ორი დღის წინ დაიკეტა. მუშაობას მხოლოდ ”ტომ ტეილორის”, ”სელიოსა” და ”დიპამის” მაღაზიები აგრძელებენ.

დაკეტილი მაღაზიების თანამშრომლები პირად საუბრებში ამბობენ, რომ ბოლო ორი თვის ანაზღაურება არ აუღიათ. ამიტომ, სამსახურიდან წამოვიდნენ. როდის აუნაზღაურებენ დავალიანებას და კვლავ გაიხსნება თუ არა მაღაზიები, არ იციან.

მყიდველის სიმცირეზე ციხის ტერიტორიაზე არსებული სხვა მაღაზიების თანამშრომლებიც საუბრობენ.

”ხელფასი 300 ლარი გვაქვს და დამატებით ბონუსებს ამ თვეში ველოდებით. სეზონზე კარგი ვაჭრობა გვქონდა, ახლა ცოტა მოიკლო. ყოფილა დღე, როცა არაფერი გაგვიყიდია, მაგრამ მუშაობას ვაგრძელებთ”, - ამბობს მაღაზია ”ზარაფხანას” გამყიდველი ნინო ქიმერიძე.

შპს ”რაბათი 2012” დირექტორი აშოტ ტონაკანიანი მაღაზიების დროებით დაკეტვის მიზეზად კლიენტების სიმცირეს ასახელებს.

”ზამთარია და ციხეს ცოტა ხალხი სტუმრობს, ამიტომ, დროებით დაიკეტა მაღაზიები”, - განუცხადა ტონაკანიანმა ”სამხრეთის კარიბჭეს” სატელეფონო საუბარში.

ეს ციხის ტერიტორიაზე მაღაზიების დაკეტვის პირველი შემთხვევა არ არის. ახალციხის ციხის თანამშრომლების თქმით, კლიენტების სიმცირის გამო ოქტომბრიდან ღვინის მაღაზია ”მეღვინეობა ხარებაც” დაიკეტა.



[თინათინ ზაზაძე, ახალციხე]