მიხეილ სააკაშვილი: ‘ახალციხეში მადლობის სათქმელად ჩამოვედი’

საქართველოს პრეზიდენტი ახალციხის ციხეს დაახლოებით 17:00 საათზე ესტუმრა. მას სამცხე-ჯავახეთის მხარის რწმუნებული ივანე წიკლაური და გუბერნატორის მოადგილე გელა დემეტრაძე ახლდნენ.

პრეზიდენტმა ციხის ტერიტორიაზე არსებული მაღაზია „მესხური ბრენდი“ დაათვალიერა და მისი მეპატრონეები ღირსების ორდენით დააჯილდოვა.

„ეს მაღაზია ნამდვილად იმსახურებდა, რომ მოვსულიყავით და მადლობა გვეთქვა. „მესხური ბრენდი“ ერთადერთი მაღაზიაა, რომელიც ციხეში არსებობს, ამასთანავე ადგილობრივი ბრენდია, ინარჩუნებს და პოპულარიზებას უწევს ადგილობრივ პროდუქციას. სახელმწიფო ჯილდოები ამისთვის არის, რომ მადლობა უთხრა ასეთ ხალხს. სამწუხაროა, რომ ამის გარდა ყველა სხვა მაღაზია დაიხურა“, - აღნიშნა მიხეილ სააკაშვილმა,.

თუმცა, პრეზიდენტს არ შეუმჩნევია და არც უხსენებია კიდევ ერთი მაღაზია, რომელიც უნდა გაიარო, რომ "მესხურ ბრენდში" შეხვიდე და რომელიც ორი კვირის წინ გაიხსნა. მიხეილ სააკაშვილმა ამ მაღაზიას გვერდი აუარა.

პრეზიდენტმა განაცხადა, რომ ადგილობრივი ხელისუფლება არასწორად მოიქცა, როცა მათ გადასახადები აღარ გადაუხადა: „ის, რომ შუქის, წყლის და კომუნალურ ხარჯებს იხდიდა ადგილობრივი მუნიციპალიტეტი და შეუწყვიტა, არ იყო სწორი. პირველი ორი წელიწადი მთავრობა უნდა დაეხმაროს ბიზნესს, რომ ფეხზე დადგეს. სხვანაირად თავისით ეს არ მოხდება, თავისით ეს არ აშენდებოდა, თავისით ეს მაღაზიები ვერ იფუნქციონირებდნენ და ათასგვარ სხვა სისულელეზე ფულის გადაყრას ჯობდა, ის ჩვენი დატოვებული ფული მოეხმარებინათ ამ ხალხისთვის“.

მაღაზია „მესხური ბრენდი“ ახალციხის ციხის ქვედა ნაწილშია განთავსებული. ციხის ტერიტორიაზე მაღაზია მიმდინარე წლის აპრილის დასაწყისში გაიხსნა. კომპანია „მესხური ბრენდი“ ტურისტებს მესხურ ნაწარმს სთავაზობს.

„შემატყობინეს, რომ პრეზიდენტი აპირებდა ჩვენს მაღაზიაში მოსვლას და დაჯილდოვებას. თუმცა არ ვიცოდით რა ჯილდო იყო. დაგვაჯილდოვა ალბათ იმ წვლილისთვის, რაც შევიტანეთ ჩვენი კუთხის წარმოჩენისთვის. ვცდილობთ ჩვენი კუთხის ღვინო გამოვიტანოთ ბაზარზე“, - ამბობს „მესხური ბრენდის“ დამფუძნებელი გიორგი ნათენაძე.

„მესხური ბრენდის“ დამფუძნებლები მესხურ ღვინოს საკუთარ მარანში 2009 წლიდან ამზადებენ. მათი განცხადებით, მათი მიზანია სამცხე-ჯავახეთში მევენახეობის აღდგენა.

შეგახსენებთ, რომ ახალციხის ციხის ტერიტორიაზე არსებული ბრენდული მაღაზიების უმეტესობა გახსნიდან რამდენიმე თვეში, მიმდინარე წლის დასაწყისში დაიკეტა. ამ ეტაპზე ციხის ტერიტორიაზე მაღაზია „მესხური ბრენდი“ და ღვინის მაღაზია „კახური ტრადიციული მეღვინეობა“ ფუნქციონირებს.

რაც შეეხება ციხის ტეროტორიაზე აქამდე არსებულ მაღაზიებს, მართალია პრეზიდენტმა მაღაზიების დაკეტვა გადასახადების შეწყვეტას დაუკავშირა, თუმცა, შეგახსენებთ, რომ მაღაზიები ამის გამო არ დაკეტილა. მათ ფუნქციონირება კლიენტების სიმცირის გამო შეწყვიტეს.



[თამარ თოთაძე, ახალციხე]