ახალციხის ციხეში მაღაზიები ბრუნდება

სრული დატვირთვით მაღაზია კვირის ბოლოს ამუშავდება. ღვინის მაღაზია მსურველებს ყოველდღე, 10:00 საათიდან 21:00 საათამდე მოემსახურება. მაღაზიის მენეჯერი ნინო მელიქიძე ამბობს, რომ მაღაზია სეზონურია და ტურისტებს ნოემბრის თვემდე მოემსახურება.

მაღაზია მომხმარებელს 20-მდე სახეობის ღვინოს სთავაზობს. ერთი ბოთლი ღვინის ფასი 4,50-დან 54-მდე ლარამდე მერყეობს. შეძენამდე კლიენტს ღვინის დაგემოვნება შეუძლია.

შეგახსენებთ, რომ მაღაზია”მეღვინეობა ხარება” გასული წელის 15 სექტემბერს გაიხსნა და ნოემბრის თვეში დაიხურა. მედიაში მაღაზიის დახურვის მიზეზად გაზრდილ იჯარასა და კომუნალურ გადასახადებს ასახელებდნენ. სინამდვილეში კი მაღაზიები კლიენტების სიმცირის გამო დაიკეტა.

ვინ გადაიხდის მაღაზიის კომუნალურ ხარჯებს, მენეჯერისთვის ამ ეტაპზე უცნობია.

”ზუსტად ვერ გეტვით ახლა ვაწარმოებთ მოლაპარაკებებს”,- ამბობს მელიქიძე.

მუნიციპალიტეტის გამგეობაში განმარტავენ, რომ ”მეღვინეობა ხარებას” ციხის ხელმძღვანელობასთან ხელშეკრულება გაუქმებული არ აქვს და მაღაზიის გახსნა ნებისმიერ დროს შეეძლო. ხელშეკრულების თანახმად, კი 15 მაისიდან გადასახადები ყველა კომერციულმა დაწესებულებამ თავად უნდა გადაიხადოს.

”ამისთვის მრიცხველები დაუმონტაჟდებათ. რაც შეეხება ქირას, იქნება ფიქსირებული გადასახადი, ამ თემაზე ვმუშაობთ და რაოდენობა როგორ განისაზღვრება ჯერ არ ვიცით”,- განმარტავს ახალციხის მუნიციპალიტეტის გამგებლის მოვალოების შემსრულებული ბესიკ ბლიაძე.

შეგახსენებთ, რომ ტურისტული სეზონის დაწყების შემდეგ, ეს ციხეში გახსნილი მეორე მაღაზიაა. პირველი მაღაზია ციხის ტერიტორიაზე გუშინ, 1 აპრილს გაიხსნა.

[თინათინ ზაზაძე, ახალციხე]