სამცხე-ჯავახეთში სავაჭრო ობიექტები დროებით იხურება

შეზღუდვა ხვალიდან, 20 მარტიდან ამოქმედდება.

„ჩვენთანაც კომერციულ ობიექტებს მიეცათ შესაბამისი რეკომენდაცია დროებით შეაჩერონ საქმიანობა. აფთიაქები, სასურსათო მაღაზიები და კვების ობიექტები, რომლებმაც ე.წ გატანის სერვისი აამოქმედეს ჩვეულ რეჟიმში იმუშავებენ“, - გვითხრეს ახალციხის მერიაში.

სავაჭრო ობიექტების დროებით დაკეტვის გადაწყვეტილება მიიღეს ადიგენშიც.

„გავაფრთხილეთ, დოებით იხურებიან. მუშაობას განაგრძობენ სურსათის მაღაზიები, აფთიაქები, ბანკები და ბენზინგასამართი სადგურები“,- გვითხრა ადიგენის მუნიციპალიტეტის მერმა ზაქარია ენდელაძემ.

იგივე სიტუაციაა რეგიონის სხვა მუნიციპალიტეტებშიც.

„ჩვენთან იხურება ტექნიკის მაღაზიები და სილამაზის სალონები“, - გვითხრეს ბორჯომისა და ნინოწმინდის მერიებში.

სილამაზის სალონების დროებით დახურვის შესახებ რეკომენდაცია ყველგან გაიცა.

„დაგვირეკეს და გვითხრეს, რომ პირველ აპრილამდე უნდა შევაჩეროთ მუშაობა“,- განაცხადეს ახალციხის ერთ-ერთ სალონში.

დღეის მდგომარეობით საქართველოში კორონავირუსის 40 დადასტურებული შემთხვევაა. აქედან ერთი პირი, შუახნის კაცი გამოჯანმრთელდა და ბინაზე გაეწერა. 19 მარტის მდგომარეობით, დაკეტილია საგანმანათლებლო დაწესებულებები, დისტანციურ რეჟიმზე მუშაობს ადგილობრივი სამთავრობო და არასამთავრობო ორგანიზაციები.

[მარიამ ბარძიმაძე,ახალციხე]