საავადმყოფოებში ბაგა–ბაღის აღსაზრდელების მიმართვიანობამ იკლო

კლინიკა „იმედში“ კი შაბათ–კვირის შემდეგ გულის რევის შეგრძნებით, პირღებინებითა და მუცლის ტკივილით საბავშო ბაღების აღსაზრდელები აღარ შეუყვანიათ.

„შაბათ–კვირას ორი პაციენტი გვყავდა, ერთს მხოლოდ ღებინება ქონდა. ამ ეტაპზე კლინიკაში მსგავსი სიმპტომებით არავინ გვიწევს“, – ამბობს კლინიკა „იმედის“ ბავშვთა განყოფილების გამგე ვიოლა ინასარიძე.

მისი თქმით, რამ გამოიწვია ბაგა–ბაღის აღსაზდელებში გულისრევა და მაღალი სიცხე ჯერ ისევ გაურკვეველია: "შესაძლებელია საკვებმა გამოიწვია, წყალი რომ იყოს, მთელი მოსახლეობა მსგავს სიტუაციაში იქნებოდა. არ არის გამორიცხული, რომ ვირუსი იყოს, რადგან ზოგს ხველა და წითელი ყელიც აქვს“.

შეგახსენებთ, რომ გასულ კვირას სამედიცინო დაწესებულებებს სკოლამდელი ასაკის 41–მა პაციენტმა მიმართა, ყველას ერთი და იგივე სიმპტომი ქონდა :გულისრევის შეგრძნება, პირღებინება, ფაღარათი, თავისა და მუცლის ტკივილი და მაღალი სიცხე. იმის გამო, რომ სამედიცინო დაწესებულებებში საკმარისი პალატები არ იყო, პაციენტებს გადასხმებს დერეფნებში უკეთებდენ.

პაციენტების უმეტესობა ახალციხის პირველი ბაგა–ბაღიდან იყო. მომხდარს დაავადებათა კონტროლის ცენტრი და სურსათის ეროვნული სააგენტო დაინტერესდა. ორივე უწყებაში აცხდებენ, რომ ანალიზის პასუხი რამდენიმე დღეში იქნება.

ამ ეტაპზე ახალციხის სკოლამდელი აღზრდის დაწესებულებებში სასწავლო პროცესი ჩვეულებრივად გრძელდება. მიუხედავად იმისა, რომ 4 დღეში ერთი და იგივე სიმპტომით, ერთი კოკრეტული ბაღიდან, ათობით პატარა მოათავსეს საავადმყოფოში, სწავლა არც შეჩერებულა. ბაღების გაერთიანებაში განმარტეს, რომ სასწავლო პროცესის შესაჩერებლად სპეციალისტების დასკვნები იყო საჭირო. დასკვნები კი ჯერ უცნობია.

[თინათინ ზაზაძე, ახალციხე]