ვირუსი თუ მოწამვლა – რა მოხდა სამი კვირის წინ ახალციხის ბაღებში, ჯერ ისევ უცნობია

სურსათის ეროვნული სააგენტო პროდუქტებსა და წყალს ახალციხის პირველ და მეხუთე ბაგა–ბაღებში იკვლევდა. ბაღების შემოწმება აპრილის პირველ კვირას ჯანდაცვის სამსახურის შეტყობინების საფუძველზე დაიწყო. ჯანდაცვის სამსახურმა კი სააგენტოს კონტროლი მას შემდეგ სთხოვა, რაც ერთი და იგივე სიმპტომებით, ახალციხის საავადმყოფოებში 3–დან 6 წლამდე ასაკის 50–ზე მეტი ბავშვი მიიყვანეს.

საკვებ პროდუქტებზე ლაბორატორიული შემოწმების საბოლოო პასუხები სურსათის ეროვნულმა სააგენტომ დღეს, 18 აპრილს მიიღო. სააგენტოს ინფორმაციით, წყალში, მზა სურსათსა და ნედლეულ პროდუქტში დარღვევა არ გამოვლინდა.

„ბავშვების საავადმყოფოში მიმართვიანობის მიზეზი, ალბათ, ჯანდაცვის დასადგენია“, – განმარტავს სურსათის ეროვნული სააგენტოს საზოგადოებასთან ურთიერთობის სამმართველოს უფროსი ვერიკო გულუა.

სურსათის სააგენტოს პარალელურად, ასევე ჯანდაცვის სამსახურის შეტყობინების საფუძველზე, საქმეში ჩართულია დაავადებათა კონტროლის ცენტრი. ცენტრის თანამშრომლები ბავშვებისგან 4 დღის განმავლობაში იღებდნენ ანალიზებს გამოსაკვლევად. მათი პირველადი ინფორმაციით, პატარებს მოწამვლის ნიშნები არ ჰქონდათ. გამოკვლევის საბოლოო პასუხი კი დღემდე არ არსებობს. დაავადებათა კონტროლის ეროვნულ ცენტრს ჯერ საბოლოო დასკვნა არ აქვს.

შეგახსენებთ, 28 მარტიდან, 4 დღის განმავლობაში ახალციხის ორ საავადმყოფოში, 3–დან 6 წლამდე ასაკის 54 პაციენტი შევიდა. ყველა მათგანს მუცლის ტკივილი, გულის რევის შეგრძნება და პირღებინება აღენიშნებოდა. 54– დან 24 მეხუთე ბაღის აღსაზრდელი იყო, 30 პირველის. ერთ–ერთ საავადმყოფოში, ‘უნიმედი სამცხეში’ უადგილობის გამო, პატარებს დერეფანში უკეთებდნენ გადასხმებს. მომხდარიდან დღემდე თითქმის სამი კვირა გავიდა, თუმცა, საბოლოო პასუხი, რა იყო მომხდარის მიზეზი, ინფექცია თუ კვებითი ინტოქსიკაცია, არ არსებობს.

[თაკო ფეიქრიშვილი, ახალციხე]