ახალციხის საბავშვო ბაღების იმ აღსაზრდელების მკურნალობის ხარჯებს, რომლებიც ერთი და იგივე სიმპტომებით მარტის ბოლოს საავადმყოფოებში მოხვდნენ, ახალციხის მერია დაფარავს. ამის შესახებ ბაღების მენეჯერებმა მშობლები უკვე გააფრთხილეს.
მარტის ბოლოს, აპრილის პირველ კვირაში, მუცლის ტკივილითა და პირღებინებით, სამედიცინო დაწესებულებაში მოხვედრილი პატარების მშობლებმა, მერიაში ფორმა N 100 უნდა მიიტანონ და განცხადება დაწერონ. მერია თანხას იმათ გადაუხდის, ვინც მკურნალობის საფასური თავად გადაიხადა.
„ერთ ბავშვზე 76 ლარი მაქვს გადახდილი, მეორე შვილის მკურნალობის თანხა, ისე წამოვედი საავადმყოფოდან არ გადამიხიდია. მე ჩემს თანხას გადამიხდიან და კლინიკას თავისას. განცხადება პარასკევს დავწერე“, – ამბობს ეკა სადათიერაშვილი, რომლის 2 მცირეწლოვანი შვილი ახალციხის პირველ ბაგა – ბაღში დადის. ეკას ორივე შვილი „უნიმედი სამცხეში“ მკურნალობდა.
ახალციხის სკოლამდელი აღზრდის დაწესებულებათა გაერთიანების დირექტორის ნანა ბერიძის განმარტებით, ამ ეტაპზე გაერთიანებაში “ფორმა N 100” 19–მა მშობელმა მიიტანა.
„ნაწილს სადაზღვეო კომპანიამ გადაუხადა, ნაწილი სოციალურად დაუცველი იყო და მკურნალობის საფასური თავად არ გადაუხდია“, – ამბობს ახალციხის სკოლამდელი აღზრდის დაწესებულებათა გაერთიანების ხელმღვანელი ნანა ბერიძე.
მკურნალობის საფასურის ასანაზღაურებლად თანხა მერის სარეზერვო ფონდიდან უნდა გამოიყოს. რა თანხებზეა საუბარი, ამ ეტაპზე უცნობია.
„ჯერ კიდევ შემოდის განცხადებები. ეს გადაწყვეტილება მერმა ვირუსის მასობრივი აფეთქების შედეგად მიიღო. “ფორმა N 100”–ში ყველას ნაწლავური ვირუსული ინფექცია უწერია. ახალციხის მერმა გაითვალიწინა მოსახლეობის სოციალ–ეკონომიური მდგომარეობა და აღნიშნული ფორმით დაემარება“, – აცხადებს ახალციხის მერიის საორგანიზაციო განყოფილების უფროსი ეკა ბერიძე.
ექიმ–ინფექციონისტის ნესტან უშხვანის განმარტებით, პაციენტების დიაგნოზი ასეთია: „ნაწლავთა ვირუსული ინფექცია –დაუზუსტებელი. ეს იყო ვირუსული, თუმცა რომელმა ვირუსმა გამოიწვია, ამ დრომდე დაზუსტებული არ არის“.
დაავადებათა კონტროლის ცენტრში ვირუსის არსებობას ვერც უარყოფენ და ვერც ადასტურებენ.
„წინა კვლევებზე ერთ ბავშვს ნორო ვირუსი აღმოაჩნდა და ალბათ ის ვირუსია აქტიური. შეამოწმეს და სხვა ვერაფერი აღმოაჩინეს. ყველა კვლევა დასრულებულია“, – ამბობს დაავადებათა კონტროლის ეროვნული ცენტრის სამცხე–ჯავახეთის რეგიონული ლაბორატორიის უფროსი სპეციალისტი ლალი კირთაძე.
შეგახსენებთ, რომ მაშინ როდესაც ბაგა–ბაღის აღსაზრდელებმა საავადმოყოფოებს მიმართეს, დაავადებათა კონტროლის ეროვნულმა ცენტრმა 29 პაციენტისგან აიღო სინჯები და აქედან ნორო ვირუსი მხოლოდ ერთს დაუდგინდა.
იმავე პერიოდში და ოდნავ მოგვიანებითაც, ბაღებში საკვები პროდუქტების შემოწმებაც დაიწყო. ამ ეტაზე ეს კვლევებიც დასრულებულია. საკვებ პროდუქტებზე ლაბორატორიული შემოწმების საბოლოო პასუხები სურსათის ეროვნულმა სააგენტომ 18 აპრილს მიიღო. სააგენტოს ინფორმაციით, წყალში, მზა სურსათსა და ნედლეულ პროდუქტში დარღვევა არ გამოვლინდა.
მიუხედავად, კვლევების ამ შედეგებისა, მშობლების ნაწილს ეჭვი მაინც კვებით ინტოქსიკაციაზე აქვს.
„დღესაც ასე მგონია, რომ კვებითია, თუმცა არ ადასტურებენ. როგორ შეიძლება საავადმყოფოში ერთ დღეს გითხრან, რომ საკვებისგანაა, მეორე დღეს კი გადათქვან“, – ამბობს ეკა სადათიერაშვილი.
შეგახსენებთ, რომ მიმდინარე წლის 28 მარტიდან, 4 დღის განმავლობაში ახალციხის ორ საავადმყოფოში, 3–დან 6 წლამდე ასაკის
54 პაციენტი შევიდა. ყველა მათგანს მუცლის ტკივილი, გულის რევის შეგრძნება და პირღებინება აღენიშნებოდა. 54– დან 24 მეხუთე ბაღის აღსაზრდელი იყო, 30 პირველის. ერთ–ერთ საავადმყოფოში, ‘უნიმედი სამცხეში’ უადგილობის გამო, პატარებს დერეფანში უკეთებდნენ გადასხმებს.
[თინათინ ზაზაძე, ახალციხე]