ახალციხეში ვირუსული ინფექციების შემთხვევებმა იმატა

N1 საბავშვო ბაღში 190 ბავშვი ირიცხება. ბაღის მენეჯერის ქეთევან საანიშვილის განმარტებით, ბოლო პერიოდში ჯგუფებში ბავშვების რაოდენობამ იკლო:„ვერ გეტყვით ზუსტ მიზეზს, რის გამო არ დადიან ბავშვები. ამ კვირაში ბავშვების რაოდენობა უფრო შემცირდა. ამ ეტაპზე ბაღში 130 ბავშვი დადის“.

ბავშვების რაოდენობამ იკლო N2 ბაგა-ბაღშიც. ბაგა-ბაღის მენეჯერის ნათელა გელაძის განმარტებით, დაახლოებით 30 აღსაზრდელი ბაღში ვირუსის გამო არ დადის.

ახალციხის სამედიცინო დაწესებულება „იმედში“ განმარტავენ, რომ ბოლო ორი კვირაა ნოლიდან 5-წლამდე ბავშვების მომართვიანობამ იმატა. პაციენტების უმეტესობას ზედა სასუნთქი გზების ინფექციები აღენიშნება.

„უმეტესობას აქვს ბრონქიტი, ლარინგიტი. რამდენიმე ბავშვი მოიყვანეს ანთებით“,-ამბობს კლინიკა „იმედის“ ოჯახის ექიმი ვიოლა ინასარიძე.

პაციენტების მიმართვიანობის მომატებაზე საუბრობენ „უნიმედი სამცხეს“ ახალციხის სამედიცინო დაწესებულებაში. მედიკოსები პირად საუბრებში ამბობენ, რომ სტაციონარში 5 წლამდე ასაკის არაერთი პაციენტი წევს.

„უნიმედი სამცხეს“ ახალციხის სამედიცინო დაწესებულების პრესსამსახურის წარმომადგენლის თეონა ლალიაშვილის განმარტებით, 7 დეკემბრის მდგომარეობით, ბავშვთა განყოფილებაში, ვირუსული ინფექციით ოთხი პაციენტი წევს.


[თინათინ ზაზაძე, ახალციხე]