რამ გამოიწვია მცირეწლოვნების მასობრივი მიმართვიანობა საავადმყოფოში, ჯერ ისევ უცნობია

წინა დღეებთან შედარებით ახალციხის რეფერალურ საავადმყოფოში ახალციხის ბაგა–ბაღების აღსაზრდელბის მიმართვიანობამ იკლო. სამედიცინო დაწესებულების ხელმძღვანელის ელდარ ალიევის განმარტებით, კლინიკას დღეს, 19 სექტემბერს მხოლოდ ერთმა პაციენტმა მიმართა: “წინა დღეებში შემოსული პაციენტების მდგომარეობა კი დამაკმაყოფილებელია, ისინი დღის ბოლომდე გაეწერებიან ბინაზე“.

შემცირებულია ახალი ფაქტების გამოვლენა ბაგა–ბაღებშიც. სკოლამდელი აღზრდის დაწესებულებათა გაერთიანების ხელმძღვანელის ნანა ბერიძის განმარტებით, დღეს თავი შეუძლოდ მხოლოდ 2–მა პატარამ იგრძნო. მიუხედავად ამისა აღსაზრდელების რაოდენობა ბაღებში ნაკლები იყო.
„შიშის ფაქტორი მუშაობს მშობლებში. ეშინიათ, რომ ვირუსი მათ შვილებსაც არ გადაედოთ“, – ამბობს ნანა ბერიძე.

სურსათის ეროვნულმა სააგენტომ ახალციხის ბაგა–ბაღებში ვითარების შესწავლა გუშინ 18 სექტემბერს დაიწყო. სოფლის მეურნეობის სამინისტროს სურსათის ეროვნული სააგენტოს სამცხე–ჯავახეთის რეგიონული სამმართველოს უფროსის ლია ბექაურის განცხადებით, ბაგა–ბაღებში აღებულია წყლისა და სხვადასხვა პროდუქტის სინჯები.

„მიმდინარეობს არაგეგმიური ინსპქტირება, აგრეთვე ავიღეთ სინჯები, მათ შორის სასმელი წყლის და პროდუქტების“, – განმარტავს იგი.
როდის იქნება პასუხებული აღებული სინჯებიდან, ამ ეტაპზე უცნობია: „ეს ლაბორატორიაზეა დამოკიდებული, როდის გამოგვიგზავნის პასუხებს. დღესაც ვატარებთ არაგეგმიურ ინსპექტირებას და სინჯები ავიღეთ რამდენიმე ბაღიდან“.

შეგახსენებთ, რომ ბოლო ოთხი დღის განმავლობაში ახალციხის რეფერალურ ჰოსპიტალს, ღებინებით, მუცლის ტკივილითა და მაღალი სიცხით, მცირეწლოვანი ბავშვები შეიყვანეს. საავადმყოფოს ინფორმაციით, ამ სიმპტომებით, სამედიცინო დაწესებულებას, ორი დღის განმავლობაში, 35–მა პაციენტმა მიმართა.

[თინათინ ზაზაძე, ახალციხე]