მესამე დღეა „უნიმედი სამცხეს“ ახალციხის სამედიცინო დაწესებულებასა და კლინიკა „იმედში“ მცირეწლოვანი პაციენტების ნაკადი არ წყდება. თითქმის ყველას ერთი და იგივე კლინიკური ნიშნები აქვს: გულისრევის შეგრძნება, პირღებინება, ფაღარათი, თავისა და მუცლის ტკივილი და მაღალი სიცხე.
„ჩემი შვილის 5 წლისაა, ორი დღის წინ, ბაღიდან რომ მოვიდა, მუცელი და თავი სტკიოდა. საღამოს აღებინა, მაშინვე წამოვიყვანე საავადმყოფოში და გადასხმა გაუკეთეს“, – ამბობს ზოია აღოშაშვილი, რომელსაც შვილი პირველ ბაგა–ბაღში დაჰყავს.
მსგავსი სიმპტომებით მკურნალობს მაია მკრტიჩიანის 5 წლის შვილიც, რომელიც ასევე პირველ ბაგა–ბაღში დადის: „30 მარტს დაეწყო მუცლის ტკივილი და გულისრევა. ყოველდღე ამომყავს და გადასხმას ვუკეთებ. რამ გამოიწვია ეს ყველაფერი, არ ვიცი“.
სწორედ პირველი ბაგა–ბაღიდან შევიდა ბოლო 4 დღეში ყველაზე მეტი პაციენტი საავადმყოფოებში. პალატები რომ გადაივსო, „უნიმედი სამცხეს“ ახალციხის სამედინიცო დაწესებულებაში პაციენტებს გადასხმები დერეფანში გაუკეთეს.
„კალიდორებში“ ზიან, არ გვყოფნის ადგილი. სულ 4 პალატა გვაქვს. თერაპიულმა განყოფლებამ დაგვითმო ადგლი და პაციენტების ნაწილი იქ წევს. პირველად პაციენტები პირველი ბაგა–ბაღიდან შემოიყვანეს, ამის შემდეგ სხვა ბაღიდანაც იყვნენ, მაგრამ მცირე რაოდენობით“, – ამბობს „უნიმედი სამცხეს“ ექიმი–ინფექციონისტი ნესტან უშხვანი.
ამ ეტაპზე „უნიმედი სამცხეს“ ახალციხის სამედიცინო დაწესებულებაში 14 პატარა მკურნალობს. ჯამში კლინიკას 35–მა პაციენტმა მიმართა.
6–მა პაციენტმა მიმართა იგივე სიმპტომებით კლინიკა „იმედს“. ბავშვთა განყოფილების გამგის ვიოლა ინასარიძის განმარტებით, ექვსივე 5 წლამდე ასაკის იყო: „ბოლო ორ დღეში მოგვმართეს. ყველა გაწერილია ბინაზე შესაბამისი მკურნალობის შემდეგ“.
ორივე სამედიცინო დაწესებულებაში ამბობენ, რომ პაციენტების უმეტესობა პირველი ბაგა–ბაღიდან იყო. ინფექციის გამომწვევ მიზეზებზე ექიმები ჯერ არ საუბრობენ და ამბობენ, რომ ანალიზების პასუხებს ელოდებიან, თუმცა, ამატებენ, რომ მოკლე დროში ინფექციის ასეთი მასშტაბური გამოვლინება, ნამდვილად ყურადსაღებია.
„ჩვენ ვერ დავადგენთ, ფაქტია რომ რაღაცამ გამოიწვია, ამას ადგენენ. ეს ვირუსმაც იცის, არაფერია გამორიცხული. გაგზავნილია და ნიმუშები დაავადებათა კონტროლის ცენტრში, ჩვენს ლაბორატორიებშიც კეთდება, ჯგუფი იკვლევს გამომწვევ მიზეზებს“, – ამბობს ნესტან უშხვანი.
პირველი ბაგა–ბაღის მენეჯერი ციცო საანიშვილის ამბობს, რომ პირველი შემთხვევა ბაღში სამშაბათს, 29 მარტს დაფიქსირდა: „ბავშვი მოთენთილი იყო, მუცელი და თავის სტკიოდა, დავურეკეთ მშობელს და წაიყვანა. რამდენ ბავშვს ჰქონდა მსგავსი სიმპტომები, ზუსტად არ ვიცი, შეიძლება ნაწილს სახლში დაეწყო გულისრევა. დღეს მშობლებთან გადავამოწმეთ და შვიდი ბავშვია, რომლებსაც ღებინება დღეს დაეწყოთ. სამშაბათიდან დღემდე ამ სიმპტომებით ბაღიდან 7–8 ბავშვი გავუშვით. ვფიქრობთ, რომ ეს ინფექციური დაავადებაა“.
პირველ ბაღში ირწმუნებიან, რომ გამორიცხულია ინფექციის გამომწვევი საკვები იყოს.
„საკვებისგან არ არის, გამორიცხულია. ყველაფერი ვადიანი და საუკეთესოა, ჩვენი ხელით ვამზადებთ პელმენს, ვასუფთავებთ ქათამს, მხოლოდ თევზი შემოდის გაყინული“, – ამბობს ციცო საანიშვილი.
კვებით ინტოქსიკაციას გამორიცხავს ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძეც. მისი თქმით, შემთხვევები ყველა ბაღში გამოვლინდა, უბრალოდ, პირველი ბაღი ყველაზე დიდ კონტიგენტიანია და შესაბამისად, ამ ბაღში უფრო მეტი შემთხვევა დაფიქსირდა.
„ეს კვებითი ინტოქსიკაცია არ არის, ახალი კერები ჩნდება. იმ ბავშვებსაც აქვთ, რომლებიც ბაღში არ დადიან, არის უფროს ასაკშიც“, – ამბობს ნანა ბერიძე და ამატებს, რომ ბავშვები იქამდე გრძნობდნენ თავს ცუდად, ვიდრე საკვებს მიიღებდნენ: „ბავშვებმა დილით არ ჭამეს, მასწავლებლები დაინტერსდნენ, გაუზომეს და სიცხეები ჰქონდათ. გუშინდელი მონაცემებით, 27 ბავშვია ავად “.
მომხდარით სურსათის ეროვნული სააგენტო დაიტერესდა. როგორც „სამხრეთის კარიბჭეს“ სურსათის ეროვნული სააგენტოში განუმარტეს, პირველ ბაგა–ბაღში ინსპექტირება დაავადებათა კონტროლის ცენტრიდან შესული შეტყობინების საფუძველზე ჩაატარეს.
“ეჭვი მიიტანეს წყალზე, ჩვენი სამსახურის თანამშრომლები მივიდნენ პირველ ბაგა–ბაღში და ჩაატარეს ინსპექტირება. გამოვლინდა რამდენიმე არაკრიტიკული შეუსაბამობა, იქ იყო ისეთი დარღვევები, რომელიც პირდაპირ ბავშვების ჯანმრთელობაზე არ აისახება, თუმცა საჭიროებს გამოსწორებას. ამიტომ მიეცათ რეკომენდაციები გამოსასწორებლად. წყლის ნიმუშები აღებულია და ლაბორატორიული კვლევის შედეგები გვეცოდინება 5–7 დღეში“, – აცხადებენ სურსათის ეროვნული სააგენტოში.
ყველა ბაღი შეამოწმა ახალციხის საზოგადოებრივი ჯანდაცვის ცენტრმა. აქ შეტყობინება 30 მარტს შევიდა. ცენტრში ამბობენ, რომ ბაღების შესამოწმებლად მაშინვე გავიდნენ.
„წაღებულია ლაბორატორიული კვლევისთვის აღებული ნიმუშები, რომ დაზუსტდეს დიაგნოზი და დადგინდეს გამომწვევი მიზეზი“, – ამბობს სამცხე-ჯავახეთის საზოგადოებრივი ჯანდაცვის ცენტრის ხელმძღვანელი ფატი ხაბულიანი.
მისი თქმით, ახალციხეში დაავადებათა კონტროლის ეროვნული ცენტრიდანაც იყვნენ: „აიღეს ანალიზები ლაბორატორიისთვის. გამოიკვლევენ განავალსა და პირნაღებ მასასაც“.
მომხდარის მიუხედავად, ახალციხის სკოლამდელი აღზრდის დაწესებულებებში სასწავლო პროცესი არ შეწყვეტილა. დაწესებულებათა გაერთიანებაში ამბობენ, რომ აღსაზრდელების 95% ბაღს არ აცდენს.
"უფლება არ მაქვს რომ სწავლა შევაჩერო. მუშაობს ჯანდაცვა, ყოველდღიური მონაცემები აქვს. ისინი გამოიტანენ დასკვნას, რა არის მიზეზი და რა პრევენციული ზომები უნდა მიიღონ. უნდა შეაჩერონ ბაღი თუ არა, მე ამაზე კომპეტენტური არ ვარ", – ამბობს ბაღების გაერთიანების ხელმძღვანელი ნანა ბერიძე და აქვე ამატებს, რომ თავად ყოველ დღე მიდის სამედიცინო დაწესებულებეში ვითარების შესასწავლად.
მანამდე, ვიდრე შესაბამისი უწყებები მომხდარის მიზეზს დაადგენენ, ახალციხის 8–ვე საბავშვო ბაღში კონტროლი გამკაცრდა – ბაღებში დეზინფექცია გააძლიერეს.
[თინათინ ზაზაძე, ახალციხე]
FM97.5 / LIVE
