'თავისუფალი დემოკრატების' ანგარიში ახალციხეში მცხოვრებლებს

„თავისუფალი დემოკრატების“ სტუმრობა მესხეთში, დღეს, 30 მარტს, ადგილობრივებთან დისკუსიით დასრულდა. შეხვედრა 16:00 საათზე, დემოკრატიული ჩართულობის ცენტრში შედგა.

ცენტრში შეკრებილებს პარტიის ლიდერმა ირაკლი ალასანიამ პოლიტიკური გუნდის ხედვები და მთავარი პრიორიტეტები გააცნო. საუბარი შეეხო ქვეყნის საგარეო კურსს, პოლიტიკურ და ეკონომიკურ საკითხებს. ასევე, საარჩევნო პროგრამასა და პროგნოზებს.

„თავისუფალი დემოკრატების“ ლიდერის თქმით, მათი მთავარი ოპონენტი კოალიცია „ქართული ოცნებაა“ და არჩევნებში სწორედ მის დასამარცხებლად იბრძოლებენ. იმ, შემთხვევაში თუ ამომრჩეველი, არჩევანს მათზე გააკეთებს, ირაკლი ალასანია მოსახლეობას სოფლის მეურნეობის გაძლიერებას, მცირე ბიზნესის განვითარების ხელშეწყობასა და განათლების ხარისხის გაუმჯობესებას ჰპირდება.

„უნდა ჩამოყალიბდეს ისეთი სამსახური, რომელიც მცირე ბიზნესს ფეხზე დადგომაში დაეხმარება. საჭიროა სახელმწიფოში პროცესების ეფექტური მართვა, რისთვისაც აუცილებელია პროფესიონალი და გამოცდილი კადრები, რომლის დეფიციტიც დღეს საქართველოში არსებობს“, – აღნიშნა ირაკლი ალასანიამ.

პრეზენტაციის შემდეგ შეხვედრა კითხვა–პასუხის რეჟიმში გაგრძელდა. ადგილობრივებს პოლიტიკოსის აზრის მოსმენა ძირითადად, ძირითადად სოციალური, ეკონომიკური, პოლიტიკური და საგარეო საკითხებზე აინტერსებდათ.

,,სამცხე- ჯავახეთში უამრავი პრობლემაა, მთავრობა ხალხს ნაკლებად აქცევს ყურადღებას. ჩვენი ყველაზე დიდი გასაჭირი უმუშევრობაა, დაბალია პენსიაც. იმედია ეს არჩევნები მაინც სასიკეთოდ შეცვლის ჩვენს ყოფას“, – განაცხადა რუსუდან გაჩეჩილაძემ.

შეგახსენებთ, პარტიის ლიდერები რეგიონს გუშინ ესტუმრნენ. გუშინ ისინი ბორჯომში მოვაჭრეებსა და სხვადასხვა დასახლებებში მცხოვრებ დევნილებს შეხვდნენ. დღეს შეხვედრები ახალციხის ბაზრიდან დაიწყო. მოვაჭრეების პრობლემების მოსმენის შემდეგ, „თავისუფალმა დემოკრატებმა“ სოფლებში, ზიკილიასა და აგარაში მოისმინეს ადგილობრივების გასაჭირი, მოგვიანებით კი ახალციხეში, ყოფილი სკოლა–ინტერნატის შენობაში შესახლებული დევნილები მოინახულეს.

დასკვნითი შეხვედრა, რომელიც დემოკრატიული ჩართულობის ცენტრში შედგა, ეროვნულ-დემოკრატიული ინსტიტუტის (NDI) ორგანიზებითა და აშშ-ის საერთაშორისო განვითარების სააგენტოს (USAID) ფინანსური დახმარებით შედგა.



[ლუბა გიორგაძე, მარიამ ბარძიმაძე, ახალციხე]