ადიგენშიც და ახალციხეშიც „თავისუფალი დემოკრატების“ ლიდერებმა მოსახლეობასთან შეხვედრა ღია ცის ქვეშ, დასახლების ცენტრში გამართეს. მათ ადგილობრივებს განუმარტეს, რომ იმ პრობლემების მოსასმენად იყვნენ ჩამოსული, რაც ხალხს აწუხებს და გამორთული კამერების ფონზე, გულწრფელი საუბარი შესთავაზეს.
„ჩვენ არ ჩამოვსულვართ ჩვენი, დაგეგმილი პროექტებით და დაპირებებით. ჩვენ გვინდა მოვისმინოთ თქვენი პრობლემები და შემდეგ თქვენს საჭიროებებს მოვარგოთ ჩვენი სამოქმედო გეგმა“, – განაცხადეს ლიდერებმა.
ახალციხეში, ცენტრალურ პარკთან შეკრებილებმა პარტიის ლიდერებს უთხრეს, რომ პირველ რიგში უსამსახურობა აწუხებთ. „უნივერსიტეტს ვამთავრებთ, მაგრამ რეალურად სამუშაო ადგილები არ არის“, – ამბობდნენ ახალგაზრდები.
ნაწილმა ირაკლი ალასანიას ახალციხის სპორტსკოლაზე შესჩივლა: „ისე ცივა, რომ იქ ჩასვლა და ვარჯიში შეუძლებელია“.
შეკრებილთა ნაწილი საუბრობდა ადგილობრივი თვითმმართველობის წევრების „კარჩკეტილობაზე“: „კაბინეტებში სხედან, ხალხთან არ გამოდიან, არ ელაპარაკებიან“.
ახალციხეში გამართულ შეხვედრას ასპინძიდან ჩამოსული რამდენიმე მოქალაქეც ესწრებოდა. ისინი ასპინძის გამგებელს, ლევან ცაბაძეს უჩიოდნენ. ამბობდნენ, რომ გამგებელი პროექტების განმახორციელებლებს ტენდერების გარეშე, მოლაპარაკებებით ეძებს. მოქალაქეებს სამსახურებიდან დაუმსახურებლად ათავისუფლებს, რაგბის ბაზა კი „თბილისიდან ჩამოყვანილი კადრებით გაავსო“.
„მე გამათავისუფლეს სამსახურიდან არაფრის გამო. ასპინძაში ახალგაზრდა ბიჭი დაიხრჩო, რომელსაც 70 დღე ეძებდნენ მტკვარში. ის ჩემი ახლობელი იყო და გამგებელს ვთხოვე, მაშველები კი ეძებენ და იქნებ თქვენც დაგვეხმაროთ–თქო. ეს არ გააკეთა, ამიტომ, შემდეგ არჩევნებზე, მე „ოცნებას“ კი მივეცი ხმა, მაგრამ გამგებელს არა. ამის გამო შტატი შემიკვეცა, დამტოვა უმუშევარი, მამის პენსიაზე“, – განაცხადა ასპინძის სპორტული ცენტრის ყოფილმა საქმეთა მმართველმა ლეილა ხმალაძემ.
პარტიის გენერალური მდივანის ალექსი პეტრიაშვილის განმარტებით, ადიგენში მოსახლეობა ძირითადად გასაღების ბაზრის არარსებობაზე ჩიოდა: „ხალხს სჭირდება ხელშეწყობა, იმისათვის რომ მათ მიერ მოყვანილი პროდუქცია ადგილობრივ ბაზარზე მაინც იყოს დომინანტი. საწყის ეტაპზე ხელისუფლება ამას აკეთებდა, მაგრამ დღეს ჩვენი შიდა ბაზრის 80% გაჯერებულია უცხოური პროდუქციით“.
პარტიის ლიდერებმა მედიასთან განმარტეს, რომ ადიგენშიც და ახალციხეშიც მოსახლეობას ძირითადად მსაგავსი პრობლემები აქვს, ეს არის პირველ რიგში დაუსაქმებლობა, ფინანსურ რესურსთან ხელმისაწვდომობა და ხალხსა და ხელისუფლებას შორის დიალოგის დეფიციტი.
„რესურსი სამარისზე მეტი აქვს ხელისუფლებას, მთავარია თანხების სწორად განაწილება, წვდომა უნდა ჰქონდეთ მოქალაქეებს მცირე თანხებთან მაინც, რომლითაც შეძლებენ წამოიწყონ თავიანთი საქმე. სხვადასხვა ფონდები შექმნეს, „აწარმოე საქართველოში“ ეს პროექტიც დაწყებულია, მაგრამ მასობრიობა არ არის“, – განაცხადა ალექსი პეტრიაშვილმა
ირაკლი ალასანიამ თვითმმართველობის მუშაობაში უშიშროების სამსახურების ჩართულობაზე ისაუბრა და აღნიშნა, რომ ამ თემაზე ჯერ კიდევ ხელისუფლებაში ყოფნისას, ყოფილ პრემიერს ბიძინა ივანიშვილსაც ესაუბრებოდა: „ჩვენ ავირჩიეთ მერები, გამგებლები, მაგრამ სამწუხაროდ ვერაფერს აკეთებენ, არ აქვთ ინსტრუმენტები და ძირითადად ასეთ საკითხებს წყვეტს უშიშროების სამსახური“, – განაცხადა ალასანიამ.
ლიდერების განცხადებით, შემდეგ ჩამოსვლაზე „თავისუფალი დემოკრატები“ ხალხს ამ პრობლემების მოგვარების კონკრეტულ გზას შესთავაზებენ.
მოსახლეობასთან შეხვედრის შემდეგ, „თავისუფალმა დემოკრატებმა“ შიდაპარტიული შეხვედრა გამართეს.
„ჩვენ ვიწყებთ ახალ ეტაპს, როდესაც ყველა რეგიონში და რაიონში ჩვენი წარმომადგენლობა იქნება ძლიერი“, – განაცხადა ალასანიამ.
[ნინო ნარიმანიშვილი, ახალციხე]