ზიკილიელების გასაჭირი და ალასანიას დაპირებები

შეხვედრა ზიკილიის მცხოვრებლებთან. 30 მარტი, 2016წ.

"თავისუფალი დემოკრატების" ლიდერი ირაკლი ალასანია, პარტიის წარმომადგენლებთან ერთად დღეს, 30 მარტს ახალციხის მუნიციპალიტეტის სოფელ ზიკილიის მოსახლეობას შეხვდა და მათ პრობლემებს მოისმინა.

ადგილობრივები საპარლამენტო უმცირესობის წარმომადგენლებს არაერთი პრობლემის შესახებ ესაუბრნენ, მათი თქმით ერთერთი ყველაზე მნიშვნელოვანი საკითხი მაღალმთიანის სტატუსის შეწყვეტა და საძოვრების არარსებობაა, რის გამოც მოსახლეობა მესაქონლეობას ვეღარ მისდევს.

„საძოვრები არ გვაქვს ზიკილიაში. ააშენეს ჰესი და მთელი სოფლის მიწა წაგვართვეს. ერთ ძროხასაც ვერ შევინახავთ, რომ ოჯახი ვარჩინოთ, რა გვეშველება არ ვიცით. გვეგონა, რომ კომპენსაციას მოგვცემდნენ, მაგრამ შედეგი არანაირი არ არის. სოფელში უმეტესობა უმუშევარია. მოსახლეობის 99%–ს ბანკის ვალები გვაქვს, ზოგს სახლსაც უყიდიან“, – ამბობს სოფელ ზიკილიაში მცხოვრები მზია კობახიძე.

„ჩვენ კანონს შემოვიღებთ, რომელიც დაგვეხმარება, რომ ჩამოვაწეროთ ხალხს უიმედო ვალები", – მიმართა ადგლობრივებს ირაკლი ალასანიამ.

მისი თქმით, 2008 წლის შემდგომ, როდესაც ქვეყანაში ეკონომიკის განვითარება სერიოზულად შეფერხდა, ვალების პირისპირ ბევრი მოქალაქე დარჩა: "ვალების ჩამოწერა საშუალებას მოგვცემს, რომ ადამიანებს გაუჩნდეთ ახალი, ეკონომიკური აქტივობების შანსი“.

„თავისუფალი დემოკრატების“ საპარლამენტო ფრაქციის თავმჯდომარე ირაკლი ჩიქოვანი ადგილობრივებს დაჰპირდა, რომ შესაბამის ორგანოებთან უშუამდგომლებს: „აღმოჩნდა, რომ ახალი კრიტერიუმებით ესდასახლება არ მოხვდა იმ სოფლების სიაში, რომლებიც გარკვეული შეღავათებით სარგებლობენ. ჩვენ დავპირდით მათ, რომ აუცილებლად დავაყენებთ ამ საკითხს სპეციალურ საბჭოსთან. კონკრეტული ინდივიდების პრობლემებს მივიტანთ აღმსარულებელი და ცენტრალური ხელისუფლების წარმომადგენლებთან“.

შეგახსენებთ, "თავისუფალი დემოკრატები" მესხეთს მეორე დღეა სტუმრობენ. გუშინ შეხვედრები ბორჯომში გაიმართა. დღეს კი სოფელ ზიკილიამდე პარტიის წევრები ახალციხის ბაზარში შეხვდნენ მოვაჭრეებს. შეხვედრები ახალციხეში დღის ბოლომდე გაგრძელდება.


შეხვედრა ზიკილიის მცხოვრებლებთან. 30 მარტი, 2016წ.

[თინათინ ზაზაძე, ახალციხე]