ირაკლი ალასანია ახალციხეში შეხვედრებს მართავს

მოვაჭრეები ალასანიას თავიანთი პრობლემების შესახებ ესაუბრნენ. მოვაჭრეები ამბობენ, რომ მათი გასაჭირი ბანკებისა და მიკროსაფინანსო ორგანიზაციების სესხებია. იმ ფონზე, რომ მოსახლეობის მსყიდველუნარიანობა შემცირებულია, ყოველთვიური პროცენტების გადახდა და ამვდროულად ოჯახის რჩენაც, ძალიან უჭირთ.

გარდა ამ საერთო პრობლემისა, რძის პროდუქტების გამყიდველები ამბობენ, რომ რძის ფხვნილისგან დამზადებული ნაწარმი, მაგალითად ყველი, მათ პროდუქციას სერიოზულ კონკურენციას უწევს და ნატურალურ პროდუქტებს ნაკლები მყიდველი ჰყავს.

ბაზრის ერთ–ერთმა მოვაჭრემ "თავისუფალი დემოკრატების" ლიდერს სოციალური დახმარების მოხსნის შესახებ შესჩივლა. ალასანია მას დაჰპირდა, რომ საკითხს შეისწავლის და სოციალურ სააგენტოსთან უშუამდგომლებს.

ირაკლი ალასანიამ და "თავისუფალი დემოკრატების" სხვა ლიდერებმა მოვაჭრეებს პრობლემების მოგვარების მათეული ხედვა შესთავაზეს. ლიდერებმა მოვაჭრეებს გააცნეს ახალი ინიციატივა, რომელიც უიმედო ვალების ჩამოწერას ითვალისწინებს.

ახალციხის ბაზრიდან "თავისუფალი დემოკრატები" სოფელ ზიკილიაში გაემგზავრნენ, სადაც ადგილობრივ მოსახლეობას შეხვდებიან. მოგვიანებით შეხვედრები ისევ ახალციხეში გაგრძელდება.

შეგახსენებთ, "თავისუფალი დემოკრატები" ახალციხეს გუშინ, 29 მარტს ესტუმრნენ. გუშინ შეხვედრები ბორჯომში გაიმართა.



[თინათინ ზაზაძე, ნინო ნარიმანიშვილი, ახალციხე]