ირაკლი ალასანია ბორჯომში მოსახლეობას შეხვდა

ბორჯომში, ინფექციური საავადმყოფოს შენობაში, 19 უსახლკარო ოჯახი წლებია ცხოვრობს. ისინი გაუარესებულ სოციალურ პირობებზე საუბრობენ. გარდა ამისა, ამბობენ, რომ გამოსახლების საფრთხის წინაშე არიან და დახმარებას ითხოვენ.

"თავისუფალი დემოკრატების" ლიდერებმა საავადმყოფოს შენობაში შესახლებულებს სოციალური დახმარებების არსებულ სისტემა და მისი გაუმჯობესების გზები გააცნეს.

"პარალელურ სამყაროში ცხოვრობს ადგილობრივი და ცენტრალური მთავრობა და ცალკე სამყაროშია ის რეალობა და ადამიანები, სადაც ახლა მე ვიმყოფები. ისეთი განსხვავებაა, როგორც ცა და დედამიწა. არის აბსოლუტურად არაადამიანური პირობები, რომელიც მინიმუმსაც კი ვერ აკმაყოფილებს. აქ არიან ადამიანები, ბორჯომელები, ზოგს სახლი დაეწვა, ზოგს დაენგრა სტიქიური უბედურების გამო, მათ ვერაფერი ვერ გადაუწყვიტა ხელისუფლებამ და ერთადერთი გზა იყო ის, რომ არაკანონიერად ამ შენობაში შეჭრილიყვნენ. ამის მერე წელიწადნახევარზე მეტია გასული და ამ ოჯახებს არც წყალი, არც დენი არ აქვთ. 19 ოჯახი ბედის ანაბარაა მიტოვებული", - განაცხადა ირაკლი ალასანიამ.

ირაკლი ალასანიამ, თანაგუნდელებთან ერთად, ბორჯომის დახურული და მოედანთან არსებული ღია ბაზარიც მოინახულა. ბაზარში მოვაჭრეებმა, უკეთესი სავაჭრო წერტილები და სათანადო პირობები მოითხოვეს. პრობლემის მოგვარების მათეულ ხედვაზე ესაუბრნენ "თავისუფალი დემოკრატები" ბაზარში მომუშავეებსაც.

ირაკლი ალასანია და მისი თანაგუნდელები ხვალ შეხვედრებს ახალციხეში გამართავენ.



[ლუბა გიორგაძე, ბორჯომი]