ირაკლი ალასანია ახალციხეში დევნილებს შეხვდა

რუსთაველის N113–ში მცხოვრები დევნილებმა უპირველეს პრობლემად წყალმომარაგების შეზღუდვა დაასახელეს. "თავისუფალი დემოკრატების" ლიდერთან შეხვედრისას მაცხოვრებლებმა აღნიშნეს, რომ დასახლებას წყალი საქაჩის საშუალებით მიეწოდებოდა. პირველ დღეებში, როცა შენობაში შეასახლეს უწყლობას არ უჩიოდნენ, თუმცა ახლა ელექტროენერგიიის ღირებულება, რომელიც საქაჩის მუშაობის შედეგად დაიხარჯა, ვერ გადაიხადეს და წყალიც არ აქვთ.

„წინა თვეში მხოლოდ 10 დღით მოვიდა წყალი, მერე გაითიშა, გადასახდელიაო. რით უნდა გადავიხადოთ, სოციალურად დაუცველები ვართ. თავიდან გვითხრეს დევნილთა სამინისტრო გადაიხდისო. დააყენონ ინდივიდუალური მრიცხველები და გადავიხდით რასაც დავხარჯავთ“, – ამბობს ცისანა გვასალია.

დევნილები იმაზეც ჩივიან, რომ მათ დასახლებაში არც საზოგადოებრივი ტრანსპორტი და არც დასუფთავების მანქანა არ მიდის.

"ანტისანიტარიაა. ქვეწარმავლები და მწერები გამრავლდებიან. არც საქალაქო ამოდის, ვერ ამოვალთ ჩვენ, გზა არ არისო, რას მოსთხოვ აბა?! ამდენი ხანია აქ ვართ და საერთოდ არ ამოსულან მერიიდან რა გიჭირთ, რა გილხინთო", – ამბობს ირმა ჩაკაბერია.

შეხვედრისას, ირაკლი ალასანია დევნილებს დაპირდა, რომ წყალმომარაგების შეზღუდვის შესახებ ი საკითხს დევნილთა და განსახლების სამინიტრსოში დააყენებს.

„პრაქტიკულად ჩაიდო ფული, გაკეთდა აუზი, მაგრამ არ იყო გათვლილი, რომ ამას დასჭირდებოდა შესაბამისი ტექნიკა და ეს ტექნიკა ცალკე დენს წვავს. აქედან გამომდინარე ამათ პრაქტიკულად წყალმომრაგება არ აქვთ. ამიტომ მივმართავთ დევნილთა სამინიტროს , რომ მათი პრობლემა გაითვალისწინოს. დეპუტატები მიმართავენ წერილით და დავუდგებით გვერდში დევნილებს“, – განმარტა პარტია "თავისუფალი დემოკრატების" ლიდერმა.

შეგახსენებთ, რომ ახალციხეში, რუსთაველის N113–ში 26 ოჯახი გასული წლის 19 დეკემბერს შეასახლეს. დევნილებისთვის ბინების გადაცემის ცერემონიას ლტოლვილთა და განსახლების მინისტრი სოზარ სუბარი ესწრებოდა.



[თაკო ფეიქრიშვილი, ახალციხე]