ახალციხეში ავარიის შედეგად ორი მამაკაცი დაშავდა

ავტოსაგზაო შემთხვევა დღეს, 21 მარტს, გვიან ღამით მოხდა. სოფელ ჭაჭარაქთან ერთმანეთს საპირისპირო მიმართულებით მოძრავი სატვირთო ავტომობილი, ე.წ. ტრაილერი და "ნივის" მარკის ავტომობილი შეეჯახნენ. შეჯახების შედეგად "ნივაში" მჯდომი ორი მოქალაქე დაშავდა, –ავტომობილის მძღოლი და მგზავრი.

სასწრაფო–სამედიცინო დახმარების სამსახურის ინფორმაციით, ორივე დაშავებული სასწრაფო დახმარების ბრიგადამ სამედიცინო დაწესებულებაში გადაიყვანა, ერთი მათგანი "უნიმედი სამცხეში" მეორე კი "კლინიკა იმედში".

თვითმხილველების ინფორმაციით, "ნივის" მარკის ავტომობილი ახალციხის მიმართულებით მოძრაობდა. ავტომობილი ასპინძის მცხოვრებს ეკუთვნის და მისი ორივე მგზავრი ასპინძის მცხოვრებია. ტრაილერი კი დასავლეთ საქართველოდან მოდიოდა. ის ახალქალაქის მიმართულებით მოძრაობდა. სატვირთო ავტომობილში მხოლოდ მძღოლი იჯდა და მას დარტყმის შედეგად დაზიანება არ მიუღია.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 276–ე მუხლის 1–ლი ნაწილით დაიწყო. აღნიშნული მუხლი გულისხმობს ტრანსპორტის მოძრაობის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

ადგილზე მობილიზებულია საპატრულო პოლიციის რამდენიმე ეკიპაჟი. შსს–ს ინფორმაციით დანიშნულია ექსპერტიზა და მომხდარის მიზეზს ექსპერტიზა დაადგენს.

[sknews.ge]