ავარიის შედეგად დაშავებული ორი მამაკაცის მდგომარეობა მძიმეა

ავტოსაგზაო შემთხვევის შედეგად დაშავებულ მამაკაცს, რომელიც გუშინ ღამით „უნიმედი სამცხეს“ ახალციხის სამედიცინო დაწესებულებაში გადაიყვანეს ამ წუთებში ოპერაციას უკეთებენ.

„მისი მდგომარეობის შესახებ ინფრიმაციას მოგვიანებით მოგაწვდით“, – აცხადებენ კლინიკაში.

რაც შეეხება შუახნის მამაკაცს, რომელიც კლინიკა „იმედში“ გადაიყვანეს, ექიმების თქმით, მისი მდგომარეობა სტაბილურად მძიმეა. დაშავებულს ოპერაცია რამდენიმე საათის განმავლობაში უტარდებოდა.

„ნაწლავები აქვს დახეთქილი, მუცილის ღრუში დანარჩენი ორგანოები არ არის დაზიანებული. ფეხიც რამდენიმე ადგილზე აქვს მოტეხილი“, –აცხადებენ კლინიკა „იმედში“.

ახლობლების ინფორმაციით, მამაკაცი მართვით სუნთქვაზე იმყოფება, მისი თბილისში გადაყვანა კი მდგომარეობის სიმძიმის გამო ვერ ხერხდება.

შეგახსენებთ, რომ ახალციხე–ახალქალაქის გზაზე, სოფელ ჭაჭარაქთან, ავტოსაგზაო შემთხვევა გუშინ, 21 მარტს გვიან ღამით მოხდა. სოფელ ჭაჭარაქთან ერთმანეთს საპირისპირო მიმართულებით მოძრავი სატვირთო ავტომობილი, ე.წ. ტრაილერი და "ნივის" მარკის ავტომობილი შეეჯახნენ. შეჯახების შედეგად "ნივაში" მჯდომი ორი მოქალაქე დაშავდა, –ავტომობილის მძღოლი და მგზავრი.

თვითმხილველების ინფორმაციით, "ნივის" მარკის ავტომობილი ახალციხის მიმართულებით მოძრაობდა. ავტომობილი ასპინძის მცხოვრებს ეკუთვნის და მისი ორივე მგზავრი ასპინძის მცხოვრებია. ტრაილერი კი დასავლეთ საქართველოდან მოდიოდა. ის ახალქალაქის მიმართულებით მოძრაობდა. სატვირთო ავტომობილში მხოლოდ მძღოლი იჯდა და მას დარტყმის შედეგად დაზიანება არ მიუღია.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 276–ე მუხლის 1–ლი ნაწილით დაიწყო. აღნიშნული მუხლი გულისხმობს ტრანსპორტის მოძრაობის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

[თინათინ ზაზაძე, ახალციხე]