ავარიის შედეგად დაზარალებული 62 წლის მამაკაცის მდგომარეობა სტაბილურია

ექიმების თქმით, პაციენტის მდგომარეობა სტაბილურია. 62 წლის მამაკაცი ამ დრომდე რეანიმაციულ განყოფილებაში იმყოფება.

„აპარატიდან მოიხსნა, სპონტანურ სუნთქვაზეა. ამ ეტაპზე სტაბილური მდგომარეობაა. ერთი საათის შემდეგ რა იქნება, ამას წინაწარ ვერ გეტყვით“, – აცხადებენ კლინიკა „იმედში“.

შეგახსენებთ, რომ ახალციხე–ახალქალაქის გზაზე, სოფელ ჭაჭარაქთან, ავტოსაგზაო შემთხვევა 21 მარტს გვიან ღამით მოხდა. სოფელ ჭაჭარაქთან ერთმანეთს საპირისპირო მიმართულებით მოძრავი სატვირთო ავტომობილი, ე.წ. ტრაილერი და "ნივის" მარკის ავტომობილი შეეჯახნენ. შეჯახების შედეგად "ნივაში" მჯდომი ორი მოქალაქე დაშავდა, –ავტომობილის მძღოლი და მგზავრი.

37 წლის მამაკაცი მიღებული ტრამვებით, მეორე დღეს, 22 მარტს „უნიმედი სამცხეს“ ახალციხის სამედიცინო დაწესებულებაში გარდაიცვალა.

გარდაცვლილი მძღოლის მეგობრის შვილია. მას მეუღლე და 3 შვილი დარჩა. ბოლო ინფორმაციით, გარდაცვლილის ოჯახი მძღოლს არ უჩივის.

ავტოსაგზაო შემთხვევის ფაქტს შინაგან საქმეთა სამინისტრო სსკ–ის 276 მუხლის პირველი ნაწილით იძიებდა, რაც ტრანსპორტის მოძრაობის წესების დარღვევას გულისხმობს. თუმცა, მას შემდეგ რაც ერთ–ერთი დაშავებული გარდაიცვალა, ძიება 276–ე მუხლის მეხუთე ნაწილით დაიწყო. აღნიშნული მუხლი ადამიანის სიცოცხლის მოსპობის გამო, თავისუფლების აღკვეთას ოთხიდან შვიდ წლამდე ითვალისწინებს.

[თინათინ ზაზაძე, ახალციხე]