ავარიის შედეგად დაზარალებული ორი მამაკაციდან ერთი გარდაიცვალა

ასპინძაში მცხოვრები, 37 წლის მამაკაცი, რომელიც "უნიმედი სამცხეში" იყო გადაყვანილი, დაახლოებით ერთი საათის წინ გარდაიცვალა. „უნიმედი სამცხეს“ ახალციხის სამედინიცო დაწესებულებაში განმარტავენ, რომ პაციენტი ოპერაციის დროს გარდაიცვალა.

„ოპერაცია ვერ გადაიტანა, პოლიტრამვა იყო. აბსოლუტურად დაზიანებული ქონდა მუცლის ღრუ. ცდილობდნენ სისხლდენა შეეჩერებინათ“, – აცხადებენ კლინიკაში.

გარდაცვლილის ახლობლები პაციენტის თბილისში გადაყვანას ითხოვდნენ, თუმცა ექიმებმა მისი გადაყვანის უფლება არ მისცეს.

"პაციენტი იმდენად მძიმე იყო, რომ გზაში გარდაიცვლებოდა“, – ამბობს ელდარ ალიევი.

ამ დრომდე სტაბილურად მძიმე რჩება მეორე დაზარალებულის მდგომარება. 62 წლის მამაკაცი მკურნალობას კლინიკა „იმედში“ გადის. მას ოპერაცია უკვე ჩაუტარდა.

შეგახსენებთ, რომ ახალციხე–ახალქალაქის გზაზე, სოფელ ჭაჭარაქთან, ავტოსაგზაო შემთხვევა გუშინ, 21 მარტს გვიან ღამით მოხდა. სოფელ ჭაჭარაქთან ერთმანეთს საპირისპირო მიმართულებით მოძრავი სატვირთო ავტომობილი, ე.წ. ტრაილერი და "ნივის" მარკის ავტომობილი შეეჯახნენ. შეჯახების შედეგად "ნივაში" მჯდომი ორი მოქალაქე დაშავდა, –ავტომობილის მძღოლი და მგზავრი.

გარდაცვლილი მძღოლის მეგობრის შვილია. მას მეუღლე და 3 შვილი დარჩა. ბოლო ინფორმაციით, გარდაცვლილის ოჯახი მძღოლს არ უჩივის.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 276–ე მუხლის 1–ლი ნაწილით დაიწყო. აღნიშნული მუხლი გულისხმობს ტრანსპორტის მოძრაობის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

[თინათინ ზაზაძე, ახალციხე]