ავარია ივლიტასთან – დაშავდა ორი ახალგაზრდა

ავტოსაგზაო შემთხვევა დაახლოებით 10:30 საათზე მოხდა. ერთმანეთს საპირისპირო მიმართულებით მოძრავი „მერსედესის“ მარკის ავტომობილი და ხორცპროდუქტების სადისტრიბუციო მანქანა შეეჯახნენ.

ავარიის შედეგად „მერსედესის“ მარკის ავტომობილის მგზავრები, 18 და 21 წლის ახალგაზრდები დაშავდნენ. ორივე მათგანი სასწრაფო–სამედიცინო დახმარების სამსახურმა კლინიკა „იმედში“ გადაიყვანა.

როგორც დაშავებულების ბაბუა „სამხრეთის კარიბჭესთან“ ამბობს, ახალგაზრდებს თავზე აქვთ ტრამვები, მათი მდგომარეობა მძიმე არ არის. ორივე დაშავებული სოფელ არლის მცხოვრებია. ახალგაზრდები არლიდან ახალციხეში მოდიოდნენ.

დარტყმის შედეგად არ დაშავებულა სადისტრიბუციო მანქანის მძღოლი. როგორც მძღოლის მამა ამბობს, მის შვილს ახალციხიდან ადიგენში, სასურსათო მაღაზიებში, ხორცპროდუქტები გადაჰქონდა.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 276–ე მუხლის 1–ლი ნაწილით დაიწყო, რაც გულისხმობს ტრანსპორტის მოძრაობის წესის დარღვევას იმის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.







[ლუბა გიორგაძე, ნინო ნარიმანიშვილი, ახალციხე]