ბორჯომში 'სოფლის მხარდაჭერის პროგრამის' ფარგლებში შეხვედრები დასრულდა

ბორჯომის მუნიციპალიტეტის სოფლებში მოსახლეობის უმეტესობამ გზების მოწესრიგება, რიტუალების სახლის დასრულება, სკვერების და სახნავ-სათესი მიწების შემოღობვა, განათების სისტემის რეაბილიტაცია, სანიაღვრე არხებისა და სასმელი წყლის სისტემის მოწყობა დაასახელა.

წელს პროგრამის ფარგლებში ბორჯომის მუნიციპალიტეტის სოფლებში ინფრასტრუქტურის მოსაწესრიგებლად 477 332 ლარი გაიხარჯება.

აქვე, აღსანიშნავია, რომ „თვითმმართველობის კოდექსში“ შეტანილი ცვლილებების თანახმად გადაწყვეტილების მიღების პროცესში ადგილობრივი მოსახლეობის მონაწილოების გაზრდის მიზნით, რაც ძალიან მნიშვნელოვანია ადგილობრივი დემოკრატიის განვითარებისთვის, წლევანდელ სოფლის მხარდაჭერის პროგრამის ფარგლებში მუნიციპალიტეტების ინფრასტრუქტურის სამსახურებს და გამგებლის წარმომადგენლებს ტერიტორიულ ერთეულებში მიეცათ რეკომენდაციები დასახლების საერთო კრებების ჩატარების თაობაზე.

წელს პირველად რეგიონალური განვითარების სამინისტროს ინფრასტრუქტურის დეპარტამენტის წარმომადგენელებმა სოფლის მხარდაჭერის პროგრამის მოსამზადებელ ეტაპზე მუნიციპალიტეტებს ურჩიეს დასახლების საერთო კრების ოქმში შეეტანათ კრების მონაწილე ქალთა და მამაკაცთა რაოდენობრივი მაჩვენებელი.

ამასთანავე, სოფლის მხარდაჭერის პროგრამის დაწყებამდე საერთაშორისო არასამთავრობო ორგანიზაცია „მერსი ქორფსმა“ შვეიცარიის განვითარებისა და თანამშრომლობის სააგენტოს (SDC) „მცირე კავკასიის ალიანსების პროგრამის“ (ALCP) ფარგლებში რეგიონის 6-ვე მუნიციპალიტეტში გამგებლის წარმომადგენლებისთვის (სოფლის რწმუნებულებისთვის) ჩაატარა ტრენინგები თემაზე: „გენდერული თანასწორობის პოლიტიკა საქართველოში და ქალთა მონაწილეობის მნიშვნელობა ადგილობრივ დონეზე გადაწყვეტილების მიღების პროცესში“

[თინათინ ზაზაძე, ბორჯომი]