ასპინძაში სოფლის კრებების ჩატარება სრულდება

ასპინძის მუნიციპალიტეტში სოფლის კრებების ჩატარება ხვალ, 18 მარტს დასრულდება.

„ხერთვისში და ხიზაბავრაში დაგვრჩა და იქაც ხვალ ჩატარდება“, – ამბობს ახალციხის მუნიციპალიტეტის გამგებლის მოადგილე ალექსანდრე პაპაშვილი.

მისი თქმით, კრებების დასრულების შემდეგ, შერჩეულ პრიორიტეტებს შესათანხმებლად რეგიონული განვითარებისა და ინფრასტრუქტურის სამინისტროში გადააგზავნიან: „ორშაბათს გავუგზავნით სამინისტროს, პასუხის მიღების შემდეგ გამოვაცხადებთ საპროექტო სამუშაოებზე ტენდერს“.

„სოფლის მხარდაჭერის პროგრამის ფარგლებში“ ასპინძის სოფლებში 274.000 ლარი დაიხარჯება.

ადიგენის მსგავსად, აქაც უცნობია ასპინძის მუნიციპალიტეტის გამგეობა ადგილობრივი ბიუჯეტიდან პროგრამის განხორციელებისას თანხას ადგილობრივი ბიუჯეტიდან დაამატებს თუ არა.

„თუ კი რომელიმე სოფელს დააკლდება შესაძლებელია დავამატოთ, მაგრამ ისიც გასათვალიწინებელია, რომ ჩვენ მწირი ბიუჯეტი გვაქვს“, – ამბობს ალექსანდრე პაპაშვილი.


აქვე, აღსანიშნავია, რომ წელს პირველად რეგიონალური განვითარების სამინისტროს ინფრასტრუქტურის დეპარტამენტის წარმომადგენელებმა სოფლის მხარდაჭერის პროგრამის მოსამზადებელ ეტაპზე მუნიციპალიტეტებს ურჩიეს დასახლების საერთო კრების ოქმში შეეტანათ კრების მონაწილე ქალთა და მამაკაცთა რაოდენობრივი მაჩვენებელი.

ამასთანავე, სოფლის მხარდაჭერის პროგრამის დაწყებამდე საერთაშორისო არასამთავრობო ორგანიზაცია „მერსი ქორფსმა“ შვეიცარიის განვითარებისა და თანამშრომლობის სააგენტოს (SDC) „მცირე კავკასიის ალიანსების პროგრამის“ (ALCP) ფარგლებში რეგიონის 6-ვე მუნიციპალიტეტში გამგებლის წარმომადგენლებისთვის (სოფლის რწმუნებულებისთვის) ჩაატარა ტრენინგები თემაზე: „გენდერული თანასწორობის პოლიტიკა საქართველოში და ქალთა მონაწილეობის მნიშვნელობა ადგილობრივ დონეზე გადაწყვეტილების მიღების პროცესში“

[თინათინ ზაზაძე, ასპინძა]