ადიგენში ‘სოფლის მხარდაჭერის პროგრამის’ მეორე ეტაპი იწყება[R]

აღნიშნული პროექტები 20 ადმინისტრაციული ერთეულის, 55 დასახლებაში მაცხოვრებლებმა სოფლის საერთო კრებებზე ხმათა უმრავლესობით შეარჩიეს.

მოსახლეობის მიერ არჩეულ პრიორიტეტებს შორისაა: სასმელი და სარწყავი წყლის სისტემების რეაბილიტაცია, გარე განათების ქსელის მოწყობა, შიდა გზების მოხრეშვა და სხვა.

ქვეყნის მასშტაბით "სოფლის მხარდაჭერის პროგრამის“ ფარგლებში, 3700 სოფლის მცხოვრებმა თავად გადაწყვიტა, თუ როგორ დაიხარჯება პროგრამისთვის გამოყოფილი 40 მილიონი ლარი. შედეგად, სოფლის კრებებზე მიღებულია 2 300-ზე მეტი გადაწყვეტილება მცირე ინფრასტრუქტურული პროექტების განხორციელების შესახებ. „სოფლის მხარდაჭერის პროგრამის“ მიმდინარეობისა და შესრულების საერთო კოორდინაციას და მონიტორინგს რეგიონული განვითარებისა და ინფრასტრუქტურის სამინისტრო განახორციელებს.

ადიგენის მუნიციპალიტეტში შერჩეული პროექტების განხორციელებას, ცენტრალური ბიუჯეტიდან 638 ათასი, ხოლო ადგილობრივი ბიუჯეტიდან 78 ათასი ლარი მოხმარდება. შესაბამისი საპროექტო და სამშენებლო სამუშაოები კი პირველი აპრილის შემდეგ ეტაპობრივად დაიწყება.