ადიგენში 'სოფლის მხარდაჭერის პროგრამის' ფარგლებში კრებების ჩატარება სრულდება

ადიგენში მუნიციპალიტეტში სოფლის კრებები 21 ადმინისტრაციულ ერთეულში ჩატარდა.

ადგილობრივი თვითმმართველობის საზოგადოებასთან ურთიერთობის სამსახურის წარმომადგენლის მამუკა კალანდაძის განმარტებით, მოსახლეობის უმეტესობამ პრიორიტეტებად სასმელი და სარწყავი წყლის სისტემების, ასევე შიდა გზების მოწესრიგება დაასახელა.

„რამდენიმე სოფელში დასრულდება რიტუალების სახლის მოწყობა და ინვენტარით აღჭურვა. დანარჩენ სოფელში გზების და წყლის პრობლემების მოგვარებას ითხოვენ“, – ამბობს მამუკა კალანდაძე.

მისი თქმით, ვიდრე საპროექტო სამუშაოებზე ტენდერს გამოაცხადებენ, მანამდე შერჩეული პრიორიტეტების შესახენ ინფორმაცია რეგიონული განვითარებისა და ინფრასტრუქტურის სამინისტროში უნდა გადააგზავნონ:„დაველოდებით სამინისტროდან პასუხს და ამის შემდეგ გამოვაცხადებთ ტენდერს“.

შეგახსენებთ, რომ მიმდინარე წელს ადიგენის მუნიციპალიტეტს „სოფლის მხარდაჭერის პროგრამის“ ფარგლებში 562. 524 ლარი ერგო. აღნიშნული თანხიდან 3 %–ი საპროექტო სამუშაოებისთვისაა გათვალიწინებული.

აქვე, აღსანიშნავია, რომ წელს პირველად რეგიონალური განვითარების სამინისტროს ინფრასტრუქტურის დეპარტამენტის წარმომადგენელებმა სოფლის მხარდაჭერის პროგრამის მოსამზადებელ ეტაპზე მუნიციპალიტეტებს ურჩიეს დასახლების საერთო კრების ოქმში შეეტანათ კრების მონაწილე ქალთა და მამაკაცთა რაოდენობრივი მაჩვენებელი.

ამასთანავე, სოფლის მხარდაჭერის პროგრამის დაწყებამდე საერთაშორისო არასამთავრობო ორგანიზაცია „მერსი ქორფსმა“ შვეიცარიის განვითარებისა და თანამშრომლობის სააგენტოს (SDC) „მცირე კავკასიის ალიანსების პროგრამის“ (ALCP) ფარგლებში რეგიონის 6-ვე მუნიციპალიტეტში გამგებლის წარმომადგენლებისთვის (სოფლის რწმუნებულებისთვის) ჩაატარა ტრენინგები თემაზე: „გენდერული თანასწორობის პოლიტიკა საქართველოში და ქალთა მონაწილეობის მნიშვნელობა ადგილობრივ დონეზე გადაწყვეტილების მიღების პროცესში“

[თინათინ ზაზაძე, ადიგენი]