რაში დაიხარჯება 'სოფლის მხარდაჭერის პროგრამის' ფული ადიგენის მუნიციპალიტეტში?

2015 წელს ადიგენის მუნიციპალიტეტის 20 ტერიტორიულ ორგანოში "სოფლის მხარდაჭერის პროგრამის" ფარგლებში 80 პროექტი განხორციელდება. აღნიშნული პროექტებისთვის ჯამში 545 017 ლარია გათვალისწინებული.

ტრადიციულად ყველაზე მეტი, 32 პროექტი რიტუალების სახლს შეეხება. ამ პროგრამის ფარგლებში ადიგენის სოფლებში დაგეგმილია რიტუალების სახლების რეაბილიტაცია, სამზარეულოს მოწყობა, სხვადასხვა ინვენტარის შეძენა და სახურავის შეცვლა.

რიტუალების სახლის შემდეგ ყველაზე მეტი პროექტი სასმელ და სარწყავ წყალს შეეხება. სასმელი წყლის სისტემის მოსაწესრიგებლად ადიგენის სოფლებში 18 პროექტი, სარწყავი წყლის სისტემისთვის კი 10 პროექტის განხორციელება იგეგმება.

ასევე, 7 პროექტი სოფლის გზების რეაბილიტაციას, 4 სასაფლაოს შემოღობვას, 3 საბავშვო ბაღების რეაბილიტაციას, 2 სპორტული მოედნის მოწყობა, თითო–თითო კი პარკში ატრაქციონის მოწყობას, წყალსაქაჩს, სანიაღვრე არხსა და ელექტრო წისქვილის მოწყობას შეეხება.

ადიგენის მუნიციპალიტეტის გამგეობაში განმარტავენ, რომ "სოფლის მხარდაჭერის პროგრამით" გათვალისწინებული სამუშაოები უმეტეს სოფლებში უკვე დაწყებულია.

[თამარ თოთაძე, ადიგენი]