ეკა ბესელია: ‘ადიგენში სასაფლაოს საკითხი თვითმმართველობამ უნდა მოაგვაროს’

„ეს ადამიანის უფლებების დარღვევაა, ამიტომ ამაში ჯერ ადგილობრივი სამართალდამცავები უნდა ჩაერთონ“, – აცხადებს ბესელია ადიგენის მუნიციპალიტეტის სოფლებში ქრისტიანისა და მუსლიმის დასაფლავების გამო შექმნილი პრობლემების შესახებ.

მისი თქმით, რელიგიურ ნიადაგზე შექმნილი პრობლემების მოგვარებას განსაკუთრებული სიფრთხილე სჭირდება: „ამიტომ ეს საკითხი ადგილობრივმა თვითმმართველობამ ძალიან ფაქიზად და კორექტულად უნდა მოაგვაროს“.

სასაფლაოს პრობლემა რომ პირველ რიგში ადგილობრივმა ხელისუფლებამ უნდა მოაგვაროს, ამაზე პარლამენტში ადამიანის უფლებათა დაცვის კომიტეტის თავმჯდომარის მოადგილე გედავან ფოფხაძეც საუბრობს.

„ამ ადამიანებმა პრობლემის მოსაგვარებლად მუნიციპალიტეტებს უნდა მიმართონ, მაგრამ რადგან მათი უფლებები დაირღვა, შესაძლოა, ამაში ცენტრალური ხელისუფლებაც ჩაერიოს. თუმცა, პირველ რიგში ეს საკითხი მაინც მუნიციპალიტეტის დონეზე უნდა გადაწყდეს. რადგან საფლავების გახსნას კურირებს მუნიციპალიტეტი“, – ამბობს ფოფხაძე.

ადიგენის მუნიციპალიტეტის გამგეობაში აღნიშნულ საკითხზე კომენტარს არ აკეთებენ. ადიგენის მუნიციპალიტეტის საკრებულოს თავმჯდომარე კი აცხადებს, თუ სოფელში სასაფლაო არსებობს, გარდაცვლილი იქ უნდა დაასაფლაონ და არ ესმის, რა საჭიროა ახალი სასაფლაოს გახსნა. ასევე, იგი ირწმუნება, რომ ყველა გარდაცვლილს შესაბამისი პატივი უნდა მიეგოს, თუმცა, როგორ შეიძლება მოხდეს ეს მაშინ, როცა მუსლიმს ქრისტიანის, ქრისტიანს კი მუსლიმების სასააფლაოზე არ ასაფლავებენ, სოფელში კი ახალი სასაფლაოს გახსნის საშუალება არ ექნებათ, ამბობს: „მეტს აღარ გიპასუხებთ“.

შეგახსენებთ, ადიგენის მუნიციპალიტეტის სოფელ ზანავში ქრისტიანის, სოფელ ადიგენში კი მუსლიმის დასაფლავების პრობლემა შეიქმნა. ამის გამო ორივე სოფელში მუსლიმი და ქრისტიანი თემი ერთმანეთს დაუპირისპირდა. მისცემს თუ არა ადგილობრივი თვითმმართველობა, როგორც ქრისტიან, ასევე, მუსლიმ თემს სოფელში ახალი სასაფლაოს გახსნის უფლებას, უცნობია.

[თამუნა უჩიძე, ადიგენი]