ადიგენის მუსლიმმა და ქრისტიანმა თემმა შეთანხმებას მიაღწია

დაპირისპირებულ მხარეებს შორის მოლაპარაკება დღეს, 2 მარტს, ადიგენის მუნიციპალიტეტის გამგეობის შენობაში შედგა.

შეხვედრას, რომელიც 09:30 საათზე დაიწყო, ორივე მხარიდან როგორც საერო, ასევე სასულიერო პირები ესწრებოდნენ.

კერძოდ, შეხვედრას ესწრებოდნენ სამცხე–ჯავახეთის გუბერნატორი აკაკი მაჭუტაძე, ადიგენის მუნიციპალიტეტის გამგებელი ზაქარია ენდელაძე, დასავლეთ საქართველოს მუფთი ბეგალრ ქამაშიძე, სამცხე–ჯავახეთის მუფთი მამუკა ვაშაყმაძე, ჭულეს მონასტრის წინამძღვარი მამა ანთიმოზი, ერთ–ერთი სასულიერო პირი ზარზმის მონასტრიდან და სოფელ ადიგენში მცხოვრები ადგილობრივები, როგორც მუსლიმები, ასევე ქრისტიანები.

დაახლოებით ერთსაათიანი დისკუსიის შედეგად, მხარეები შეთანხმდნენ, რომ სოფელ ადიგენში არსებული სასაფლაოს ტერიტორია გაიზარდოს, ანუ, გამოიყოს დამატებითი ადგილი, სასაფლაოსთან და სივრცე ორად გაიყოს. შეთანხმების მიხედვით, სასაფლაოს ექნება ორი შესასვლელი.

როგორც დასავლეთ საქართველოს მუფთმა ბეგლარ ქამაშიძემ განაცხადა, ორივე მხარე მოლაპარაკების ამ პირობებს დასთანხმდა და შეხვედრა დასრულდა: "უახლოეს დღეებში გამოიყოფა ადგილი სასაფლაოსთვის. აქ ყველაფერი მოგავრებულია, მე ბათუმში დავბრუნდები".

შეგახსენებთ, სოფელ ადიგენში დაპირისპირება სასაფლაოს გამო ორი დღის განმავლობაში გრძელდებოდა. ვითარების ესკალაცაი რელიგიის სააგენტოს რეკომენდაციამ გამოიწვია, რომლის ტანახმად, თვითმმართველობას მუსლიმების სასაფლაოსთვის ადგილი უნდა გამოეყო. ადგილობრივი ქრისტიანები ამ გადაწვეტილებას ეწინააღმდეგეოდნენ, ისინი ფიქრობდნენ, რომ შემდეგში სასაფლაოს ტერიტორიაზე მუსლიმი თემი მეჩეთს ააშენებდა. 29 თებერვალს ეს დაპირისპირება შეხლა–შემოხლაშიც გადაიზარდა, რის შედეგად სამი ადამიანი დაზარალდა, ამათგან ერთს თვალი დაუზიანდა, ერთს თავზე აქს ჭრილობა, ერთი კი შეუძლოდ გახდა.

გუშინ დაპირისპირებულ მხარეებს შორის მედიაციას ადიგენის მუნიციპალიტეტის გამგებელი ეცადა. იგი მხარეებს სთავაზობდა გამოეყოთ სამ–სამი წარმომადგენელი მოლაპარაკებისთვის, თუმცა, მუსლიმები ამ მოთხოვნას არ დასთანხმდნენ. გუშინ სოფელ ადიგენს დაპირისპირებისგან მთელი დღის განმავლობაში სამართალდამცავი უწყებები იცავდნენ, მათ მხარეებს შორის კორიდორი ჰქონდათ გაკეთებული.

[ნინო ნარიმანიშვილი, თამუნა უჩიძე, ადიგენი]