ყაჩაღობასა და გაუპატიურების მცდელობაში ბრალდებული დააკავეს – რა მოხდა სოფელ ფხეროში

შემთხვევა, გუშინ 29 ინავარს 17:00 საათისთვის, სოფელ ფხეროს შესასვლელში მოხდა. ამ დროისთვის, სტუდენტი გოგონა ახალციხიდან შინ, ფეხით ბრუნდებოდა. მას ერთი პირი თავს დაესხა, ფიზიკურად გაუსწორდა, საფულე და ტელეფონი წაართვა და გაუპატიურება სცადა.

როგორც ადგილობრივები ამბობენ, გოგონა ნაცემია, ის პირი კი, რომელიც მას თავს დაესხა, შეიარაღებული არ იყო.

„გაწევ–გამოწევის დროს ეს გოგო ფერდობზე დაგორებულა, ყვიროდა მიშველეთო. ამ დროს გოგონას ტელეფონზე დედა ურეკავდა, პარასკევი საღამო იყო და იცოდა, რომ სახლში უნდა მისულიყო. იმას კი ვინც აყაჩაღებდა შემთხვევით ტელეფონზე ხელი ისე მოუხვდა, რომ დედის ზარს უპასუხა. დედამ გოგონას კივილი გაიგონა და პოლიციაში დარეკა“, – გვიყვებიან ადგილობრივები.

მათი თქმით, სტუდენტ გოგონას თან ძვირადღირებული არაფერი ჰქონდა: „ისეთი შეძლებული რომ ყოფილიყო, თან ძვირფასეულობა ეტარებინა, ან ძვირად ღირებული ტელეფონი ჰქონოდა, სახლში ფეხით ხომარ წავიდოდა?!“

როგორც ფხეროში მაცხოვრებლები ამბობენ, ბრალდებული წარსულში ნასამართლევია.

ბრალდებიული სამცხე–ჯავახეთის პოლიციის დეპარტამენტის წარმომადგენლებმა ცხელ კვაზე დააკავეს. მას ბრალი ყაჩაღობასა (სსკ–ის 179–ე მუხლი) და გაუპატიურების მცდელობაში (სსკ–ის 19–137–ე მუხლი) ედება.

[თამუნა უჩიძე, ადიგენი]