9 წლის გოგონას გარდაცვალების საქმეზე სასამართლო არსებით განხილვას იწყებს

ახალციხის რაიონულ სასამართლოში, სასამართლო სხდომა 24 იანვარს გაიმართა. სხდომაზე პროკურორმა მტკიცებულებების ჩამონათვალი წარადგინა. ყველა მათგანი დაცვის მხარემ უდავოდ ცნო და შესაბამისად, მათ სასამართლო აღარ გამოიკვლევს.

ადვოკატის ნუგზარ სამარჯიშვილის განცხადებით, ბრალდებული დანაშაულს აღიარებს და მტკიცებულებებსაც ეთანხმება.

სასამართლო, საქმის არსებით განხილვას 30 იანვრიდან დაიწყებს. ადვოკატი არ გამორიცხავს, რომ საქმესთან დაკავშირებით, საპროცესო შეთანხმება გაფორმდეს. ვიდრე ეს მოხდება, მათ ამ მოთხოვნით ჯერ პროკურატურას უნდა მიმართონ და დაზარალებული ოჯახის თანხმობაც მიიღონ.

შეგახსენებთ, რომ ავტოსაგზაო შემთხვევა ადიგენში, სოფელ ბოლაჯურში 1–ელ დეკემბერს მოხდა, 9 წლის გოგონა ძმასთან ერთად სკოლიდან სახლში ბრუნდებოდა, როდესაც გზაზე გადაჭარბებული სიჩქარით მოძრავი ავტომანქანა დაეჯახა. გოგონა ადგილზე გარდაიცვალა.

ავტომანქანას, ალკოჰოლის ზემოქმედებსი ქვეშ მყოფი, იმავე სოფლის მკვიდრი 29 წლის ა.ჩ მართავდა. მას ბრალი სისხლის სამართლის კოდექსის 276-ე მუხლის მე-5 ნაწილით ედება, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია. დანაშაული ისჯება ვადით ოთხიდან შვიდ წლამდე.

[sknews.ge]