ყაჩაღობასა და გაუპატიურების მცდელობაში ბრალდებული 35 წლის მამაკაცია

1981 წელს დაბადებული, წარსულში მრავალჯერ ნასამართლევი ვიქტორ ლ. გაუპატიურების მცდელობისა და ყაჩაღობის ბრალდებით, შსს-ს სამცხე-ჯავახეთის პოლიციის დეპარტამენტის დეტექტივების სამმართველოსა და ადიგენის რაიონული სამმართველოს თანამშრომლებმა, ცხელ კვალზე დააკავეს.

როგორც შინაგან საქმეთა სამინისტროში აცხადებენ, გამოძიებამ დაადგინა, რომ ბრალდებული ადიგენის რაიონის სოფელ ზემო ენთელის საავტომობილო გზაზე ახალგაზრდა გოგონას თავს დაესხა, დანის გამოყენებით სიცოცხლისათვის და ჯანმრთელობისათვის საშიში ძალადობით და ასევე ძალადობის მუქარით წაართვა საფულე, მობილური ტელეფონი, სხვა პირადი ნივთები. შემდეგ ასევე ძალადობით და ძალადობის მუქარით ვიქტორ ლ-მ გოგონა ჩაიყვანა იქვე, ხევში და მისი გაუპატიურება სცადა, რის შემდეგაც ბრალდებული შემთხვევის ადგილიდან მიიმალა.

„სამართალდამცველებმა, ჩატარებული ოპერატიულ-სამძებრო მოქმედებების შედეგად, ვიქტორ ლ. მომხდარიდან რამდენიმე საათში ახალციხის რაიონის სოფელ სხვილისის მიმდებარე ტერიტორიაზე დააკავეს. პოლიციამ დანაშაულის ჩადენის იარაღი - დანა ნივთმტკიცებად ამოიღო. დაკავებული ჩადენილ დანაშაულს აღიარებს. გამოძიება გაუპატიურების მცდელობისა და ყაჩაღობის ფაქტზე მიმდინარეობს (საქართველოს სსკ-ის 19-137-ე მუხლის 1-ლი და 179-ე მუხლის 1-ლი ნაწილით)“, – აცხადებენ საქართველოს შინაგან საქმეთა სამინისტროში.

შეგახსენებთ, გუშინ, 29 იანვარს, საღამოს, ადიგენის მუნიციპალიტეტის სოფელ ფხეროში ახალგაზრდა ქალი დააყაჩღეს და მისი გაუპატიურება სცადეს.
[ნინო ნარიმანიშვილი, ადიგენი]