9 წლის გოგონას გარდაცვალებაში ბრალდებული ციხეში ორ წელს გაატარებს

სოფელ ბოლაჯურში, 9 წლის გოგონას გარდაცვალებაში ბრალდებულის საქმეზე, პროკურატურასა და დაცვის მხარეს შორის საპროცესო შეთანხმება გაფორმდა.

„ვითხოვდი ერთ წელს პატიმრობას, თუმცა ბრალდებული დანაშაულს აღიარებდა, ამიტომ პროკურატურამ საპროცესო შეთანხმება შემომთავაზა და დავთანხმდი. თავად ბრალდებულიც თანახმაა“, - ამბობს მსჯავრდებულის, ახალგაზრდა მამაკაცის ადვოკატი ნუგზარ სამარჯიშვილი.

მისივე თქმით, საპროცესო შეთანხმებას ეთანხმებიან გარდაცვლილი გოგონას მშობლებიც: „არ აქვთ სურვილი სამუდამოდ ციხეში დარჩეს ბრალდებული. საკმაოდ ლმობიერად მოიქცნენ, ჩვენ შვილს ამით მაინც აღარაფერი ეშეველებაო და თანახმა არიან ამ შეთანხმებაზე“.
ადვოკატის განმარტებით, საპროცესო შეთანხმება გასაჩივრებას არ ექვემდებარება.

შეგახსენებთ, რომ ავტოსაგზაო შემთხვევა ადიგენში, სოფელ ბოლაჯურში გასული წლის 1–ელ დეკემბერს მოხდა. 9 წლის გოგონა ძმასთან ერთად სკოლიდან სახლში ბრუნდებოდა, როდესაც გზაზე გადაჭარბებული სიჩქარით მოძრავი ავტომანქანა დაეჯახა. გოგონა ადგილზე გარდაიცვალა.

ავტომანქანას, ალკოჰოლის ზემოქმედებსი ქვეშ მყოფი, იმავე სოფლის მკვიდრი 29 წლის ა.ჩ მართავდა. მას ბრალი სისხლის სამართლის კოდექსის 276-ე მუხლის მე-5 ნაწილით ედებოდა, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია. დანაშაული ისჯება ვადით ოთხიდან შვიდ წლამდე.

[ლუბა გიორგაძე, ადიგენი]