გოგონას შესაძლო გაუპატიურების საქმეზე აუდიტმა სკოლაში ბულინგი ვერ დაადგინა

„მშობელს განათლების სამინისტროში საჩივარი ჰქონდა შეტანილი, თითქოს მისი შვილი სკოლაში ბულინგის მსხვერპლი იყო. ადანაშაულებდა მასწავლებლებს, მოსწავლეებს და მანდატურსაც. დაახლოებით თვენახევარი სწავლობდა აუდიტი ამ საკითხს და პასუხი მივიღეთ, რომ გოგონას მიმართ ბულინგის შემთხვევა არ ყოფილა“, – აცხადებს სკოლის დირექტორი.

შეგახსენებთ, რომ საქმე ეხება ახალციხის ერთ–ერთ სკოლაში მეცხრე კლასელ გოგონას, რომელიც თანაკლასელ ბიჭს გაუპატიურებაში ადანაშაულებს. გოგონას დედის განცხადებით, მას შემდეგ რაც აღნიშნული ფაქტი გახმაურდა, მისი შვილი სკოლაში ბულინგის მსხვერპლი გახდა.

აღნიშნულ ფაქტს კატეგორიულად უარყოფენ, როგორც მასწავლებლები ასევე გოგონას თანაკლასელები.

შესაძლო გაუპატიურების ფაქტს შსს–მ 2018 წლის მარტიდან იძიებს. საქმის მოკვლევა თავიდან 16 წელს მიუღწეველთან სექსუალური კავშირის მუხლით დაიწყო, 19 სექტემბერს კი საქმე გადაკვალიფიცირდა და გამოძიება ახლა გაუპატიურებისა და მუქარის მუხლებით მიმდინარეობს.

[თინათინ ზაზაძე, ახალციხე]