ყაჩაღობაში ბრალდებულს აღკვეთის ღონისძიებად პატიმრობა შეუფარდეს

ადიგენის მუნიციპალიტეტის სოფელ ფხეროში მომხდარ ფაქტზე ძიება ყაჩაღობისა და გაუპატიურების მცდელობის მუხლებით მიმდინარეობს, თუმცა დაკავებულ ვიქტორ ლ.–ს ბრალი ჯერ მხოლოდ ყაჩაღობაში ედება.

„გოგონა აცხადებს, რომ ვიქტორი მის გაუპატიურებას ცდილობდა. ამ მიმართულებით ჩასატარებელია ექსპერტიზა და სხვა საგამოძიებო ღონისძიებები“, – განაცხადა სასამართლო დარბაზში პროკურორმა მამუკა ქომოშვილმა.

მისივე თქმით, გამოძიების დასრულების შემდეგ, შესაძლოა ბრალდებულს ბრალი დაუმძიმდეს.

დღეს გამართულ სასამართლო პროცესზე პროკურორმა აღკვეთის ღონისძიებად პატიმრობა ითხოვა. მისი განცხადებით, ვიქტორი ოთხჯერ ქურდობისა და ძარცვისთვისაა ნასამართლევი. იგი ბოლოს 2010 წელს დააკავეს და 2015 წელს ამნისტიით გათავისუფლდა.

„დაკავებისას გაქცევა სცადა და არ დაემორჩილა სამართალდამცავებს. მისი თავისუფლებაში დარჩენის შემთხვევაში შესაძლოა მიიმალოს“, – განაცხადა ქომოშვილმა.

დაცვის მხარე პატიმრობის შუამდგომლობას დაეთანხმა. მოსამართლემ აღკვეთის ღონისძიებად ვიქტორი ლ–ს პატიმრობა დარბაზიდან გაუსვლელად შეუფარდა.

შეგახსენებთ, 29 იანვარს, საღამოს, ადიგენის მუნიციპალიტეტის სოფელ ფხეროში ახალგაზრდა ქალი დააყაჩაღეს და მისი გაუპატიურება სცადეს. ბრალდებული ვალეში მცხოვრები, 1981 წელს დაბადებული, წარსულში მრავალჯერ ნასამართლევი მამაკაცია, რომელიც სამართალდამცველებმა ცხელ კვალზე, სხვილისის მიმდებარე ტერიტორიაზე დააკავეს. შსს–ს ინფორმაციით, პოლიციამ დანაშაულის ჩადენის იარაღი - დანა ნივთმტკიცებად ამოიღო. დაკავებული ჩადენილ დანაშაულს აღიარებს.

[თამუნა უჩიძე, ახალციხე]