ვინ მიიღებს დახმარებას – ახალციხის გამგეობა ბენეფიცირების არეალს აფართოებს

2016 წლის ბიუჯეტიდან სოციალური დახმარების გაცემის წესში შესატან ცვლილებებს ახალციხის მუნიციპალიტეტის საკრებულოს დეპუტატებმა გუშინ, 27 იანვარს, საკრებულოს რიგით მეორე სხდომაზე უყარეს კენჭი.

ადგილობრივი თვითმმართველობა მუნიციპალიტეტში მცხოვრებ ლტოლვილებს, იძულებით გადაადგილებულ პირებს, მზრუნველობამოკლებულ და სოციალურად დაუცველ ოჯახებს სასურსათო პაკეტით, აქამდე მხოლოდ ორჯერ: საახალწლოდ და სააღდგომოდ ეხმარებოდა. 2016 წლიდან კი აღნიშნული ოჯახები დახმარებას კვარტალურად, ანუ, სამ თვეში ერთხელ მიიღებენ. გარდა ამისა, სასურსათო პაკეტით დაეხმარებიან იმ ოჯახებსაც, რომლებიც შეჭირვებულად ცხოვრობენ, თუმცა სოციალურად დაუცველის სტატუსი არ აქვთ მინიჭებული.

„აქამდე 75 ათას ქულამდე ვისაც ქონდა მინიჭებული, იმ ოჯახებს ვეხმარებოდით. ახლა ეს შეზღუდვა მოვხსენით. ვინაიდან ახალი გადათვლის პაკეტმა ოჯახებს საცხოვრებელი სახლის მიხედვითაც მიანიჭა მაღალი ქულები, თუმცა ეს არ ნიშნავს იმას, რომ ოჯახის მატერიალური მდგომარეობა გამოსწორდა“, – ამბობს ახალციხის მუნიციპალიტეტის გამგეობის ჯანმრთელობის დაცვისა და სოციალური უზრუნველყოფის განყოფილების უფროსი თამილა ადვაძე.

იმ ოჯახებმა, ვინც სოციალურად დაუცველთა ბაზაში არ არის, მაგრამ, რეალურად შეჭირვებულია, გამგეობას განცხადებით უნდა მიმართონ.
„ განცხადებას დაწერენ მოქალაქეები და შემდგომში მისი გამყარება მოხდება ტერიტორიული ორგანოს წარმომადგენლის საშუალებით, ანუ, ტერიტორიული ორგანოს წარმომადგენელმა უნდა დაადასტუროს, რომ ეს ოჯახი ნამდვილად საჭიროებს დახმარებას“, – განმარტავს თამილა ადვაძე.

[თინათინ ზაზაძე, ახალციხე]