ახალციხის გამგეობა 70 სოციალურად დაუცველ ოჯახს სამშენებლო მასალას გადასცემს

ახალციხის მუნიციპალიტეტის გამგეობაში განმარტავენ, რომ სამშენებლო მასალები იმ სოციალურად დაუცველ ოჯახებს დაურიგდება, ვინც გამგეობას განცხადებით მიმართავს. ამ ეტაპზე ასეთი 70 ოჯახია.

„ვინც მოგვმართა განცხადებით, ყველა ოჯახი შევისწავლეთ. ზოგს სახურავი აქვს დაზიანებული, არიან ოჯახები, რომელთა სახლშიც ბზარებია გაჩენილი. მათთვის სამშენებლო მასალის დარიგებას ეტაპობრივად უკვე ვიწყებთ“, – ამბობს ახალციხის მუნიციპალიტეტის გამგებელი ზაზა მელიქიძე და ამატებს, რომ კიდევ არის რამდენიმე ოჯახის განცხადება, რომელსაც გამგეობის წარმომადგენლები ამ ეტაპზე სწავლობენ.

როგორც გამგეობაში განმარტავენ, სამშენებლო მასალით ის ოჯახებიც დაკმაყოფილდებიან, რომელთაც გასულ წელს ძლიერმა ქარმა საცხოვრებელი სახლის სახურავები დაუზიანა.

„გასულ წელს რამდენიმე სოფელში, ჭვინთაში, წნისში, მუსხში, ანდრიაწმინდაში, ურაველსადა კიდევ რამდენიმე სოფელში ძლიერმა ქარმა ადგილობრივებს სახლის სახურავები დაუზიანა, ჩვენ სამშენებლო მასალებს მათაც გადავცემთ“, – ამბობს მელიქიძე.

სამშენებლო მასალის შესაძენად ახალციხის გამგეობამ ადგილობრივი ბიუჯეტიდან 82 ათასი ლარი გამოყო.

[მანანა სარაშვილი, ახალციხე]