ახალციხის გამგეობაში სოციალური დახმარების გაცემის წესი იცვლება

ახალციხის მუნიციპალიტეტის გამგეობაში ის მოქალაქეები, რომლებიც სოციალურად დაუცველთა ბაზაში არ არიან რეგისტრირებულები და სამედიცინო გამოკვლევა სჭირდებათ, თვითმმართველობაში 50%–ით, არაუმეტეს 300 ლარით, დააფინანსებენ. აქამდე, სამედიცინო გამოკვლევებისთვის დახმარების მიღება ადგილობრივი ბიუჯეტიდან მხოლოდ სოციალურად დაუცველებს შეეძლოთ.

„ასევე, აქამდე, ჩვენ სამედიცინო სადიაგნოსტიკო გამოკვლევებს სოციალურად დაუცველებს ერთჯერადად ვუფინანსებდით. ახლა ამ პუნქტში შევიტანეთ ცვლილება, რომლის თანახმადაც გადასახდელი და გადახდილი თანხა 100%–ით ანაზღაურდება, ოღონდ არა უმეტეს 500 ლარისა“, – ამბობს ახალციხის მუნიციპალიტეტის საკრებულოს წევრი, ჯანდაცვისა და სოციალური საკითხების კომისიის თავმჯდომარე ალექსი ლაბაძე.

ცვლილება შევიდა დიალეზზე მყოფი ბენეფიციარების სოციალური დახმარების საკითხშიც. თუ აქამდე წელიწადში ერთი ბენეფიციარისთვის გამოყოფილი იყო 150 ლარი, ახლა თანხა გაორმაგდა და 300 ლარი გამოიყო. თითო ბენეფიციარი წელიწადში ორჯერ, აღდგომასა და ახალწელს 150–150 ლარს მიიღებს.

გაიზარდა ობოლი ბავშვებისთვის გამოყოფილი თანხის რაოდენობაც. ასეთი მუნიციპალიტეტის გამგეობაში სულ ორი ბავშვია. აქამდე თითო წელიწადში ერთჯერადად 100 ლარს იღებდა, ამის შემდეგ კი ყოველთვიურად 50 ლარს მიიღებენ.
აღნიშნული საკითხები ახალციხის მუნიციპალიტეტის საკრებულოს რიგით მეოთხე სხდომაზე განიხილეს და ყველა ცვლილებას მხარი ერთხმად დაუჭირეს.

[თამუნა უჩიძე, ახალციხე]