ახალციხის თემმა ერთჯერადი სოციალური დახმარებები მრავალჯერადი გახადა

ახალციხის თემის ტერიტორიაზე მცხოვრები მოსახლეობა, 2017 წლიდან, სოციალურ დახმარებას ახალი წესის მიხედვით მიიღებს. საკრებულოში ამბობენ, რომ "პაკეტი წინა წელთან შედარებით უფრო გაფართოვდა. ბარიერები მოხსნილია და ბევრი ერთჯერადი დახმარება, მრავალჯერადი გახდა“.

მათივე ინფორმაციით, გასულ წელს დახმარებას სოციალურად დაუცველი მოსახლეობის ის კატეგორია იღებდა, რომელთა შეფასება 0–დან 120 000 ქულამდე იყო განსაზღვრული. ახალი წლიდან კი ბარიერი 0–დან 150 000 ქულამდე აიწია;

სოციალურად დაუცველი მოსახლეობისათვის განსაზღვრული ერთჯერადი კვლევა, მკურნალობა და ოპერაცია მრავალჯერადი გახდა. მათ შეუძლიათ დაფინანსება საჭიროების მიხედვით, წლის განმავლობაში რამდენიმე მიიღონ, გაწერილი ლიმიტების შესაბამისად. რაც შეეხება წლიურ ლიმიტს, 600 ლარიდან იგი 1000 ლარამდე გაიზარდა;

დაფინანსების თანხა გაიზარდა სოციალურის მუხლებშიც.

✔️ კერძოდ, შშმ ბავშვებისათვის დაფინანსება 75 ლარიდან, 100 ლარამდე გაიზარდა;

✔️ დედ–მამით ობოლი ბავშვებისათვის დაფინანსება 75 ლარის ნაცვლად, 100 ლარი გახდა;

✔️ გაორმაგდა უხუცესთა დახმარება – 200ლარის ნაცვლად ისინი 400 ლარს მიიღებენ;

✔️ ვეტერანების დახმარება 200 ლარიდან 400 ლარამდე გაიზარდა;

✔️ დიალეზით მოსარგებლე ბენეფიციარების სოციალური დახმარება 600 ლარის ნაცვლად 1000 ლარი გახდა. ისინი ყოველ კვარტალურად 150 ლარის ნაცვლად, 250 ლარს მიიღებენ;

როგორც გამგეობაში განმარტავენ, ეს თანხა მათი მედიკამენტებისა და გზის ხარჯებისათვის განისაზღვრება, რადგან მათ ყოევლ ორ დღეში ბორჯომის მიმართულებით გადაადგილება უწევთ;

"ბენეფიციარებს, რომელთა სარეიტინგო ქულა 150 000–მდეა, ოპერაციები მრავალჯერადად დაუფინანსდებათ. იყო შემთხვევები, რომ დასჭირდათ მეორედ უფრო ძვირადღირებული ოპერაცია, ვიდრე ისარგებლეს და ვინაიდან პირველი დაფინანსებული ჰქონდათ უარის თქმა მოგვიწია, ამიტომ ეს შეძღუდვა მოიხსნა და გახდა მრავალჯერადი“, – განმარტავს ახალციხის გამგეობის სოციალური უზრუნველყოფისა და ჯანდაცვის განყოფილების უფროსი თამილა ადვაძე.

[თაკო ფეიქრიშვილი, ახალციხე]