ახალციხის გამგეობაში სოციალური დახმარების გაცემის წესი შეიცვალა

ცვლილების დამტკიცებამდე, ახალციხის გამგეობიდან დასახმარებელ პირთა კატეგორიაში რეგისტრირებული და მუდმივად მცხოვრები მოსახლეობა შედიოდა. ცვლილების შედეგად, დადგენილებაში სტატუსი "მუდმივად მცხოვრები" "ფაქტობრივად მცხოვრებით" შეიცვალა.

ადგილობრივ თვითმმართველობაში განმარტავენ, რომ მუდმივად მცხოვრების სტატუსი წლის განმავლობაში სოფლად 9 თვე ცხოვრებას ითვალისწინებს, ხოლო ფაქტობრივი – დროის პერიოდს არ აკონკრეტებს.

„ეს გამორიცხავდა ისეთ მოქალაქეებს, რომლებიც მაგალითად სტუდენტები არიან და გასული არიან სოფლიდან, ან ახლი გამოთხოვილია რძალი სოფელში და ჯერ არ აქვს 9 თვე ნაცხოვრები. ზღუდავდა ამ კატეგორიებს, არავინ რომ არ დაიჩაგროს, ასეთი ცვლილება შევიტანეთ“, – განმარატავს ახალციხის გამგეობის სოციალური უზრუნველყოფისა და ჯანდაცვის განყოფილების უფროსი თამილა ადვაძე.

ახალციხის მუნიციპალიტეტის გამგეობაში სოციალური დახმარება ჯანდაცვისა (კვლევები, ოპერაციები, მკურნალობა, ონკოლოგიური პაციენტები) და სოციალური პროგრამების 20–მდე მუხლს მოიცავს (სასურსათო პაკეტი, ფულადი დახმარება, შშმ პირები, ვეტერანები და ა.შ ).

[თაკო ფეიქრიშვილი, ახალციხე]