პერიტონიული დიალეზით მოსარგებლე ბენეფიცირები დახმარებას მიიღებენ

ახალციხის გამგეობის სოციალური დახმარების გაცემის წესის 22–ე მუხლში ცვლილება შევიდა. მისი ბენეფიციარები თირკმლის ქრონიკული უკმარისობით დაავადებული პაციენტები არიან, რომლებიც ჩანაცვლებით თერაპიას ჰემოდიალეზით გადიან. ეს ბენეფიციარები ადგილობრივი თვითმმართველობიდან ყოველ კვარტალურად 150 ლარის ოდენობით დახმარებას იღებენ.

ამ დრომდე დახმარებით მხოლოდ 11 ადამიანი სარგებლობს.

დადგენილებაში შეტანილი ცვლილბების შესაბამისად, დახმარებას ის პაციენტებიც მიიღებენ, რომლებიც მკურნალობას პერიტონიული დიალეზით გადიან.

"ჰემოდიალეზით მოსარგებლე პაციენტების გარდა, თირკმლით ჩანაცვლების თერაპიას გადიან ასევე პერიტონიული დიალეზით მოსარგებლეებიც. მართალია, იგი სახლის პირობებში ტარდება, მაგრამ ესეც თირკმლის ქრონიკული დაავადების საკმაოდ მძიმე ფორმაა, მეოთხე – მეხუთე კატეგორია. ისინი ყოველდღიურად, ყოველ 4 საათში გადასხმას საჭიროებენ“, – განმარტავს ახალციხის გამგეობის ჯანმრთელობის დაცვისა და სოციალური უზრუნველყოფის განყოფილების უფროსი თამილა ადვაძე.

მისივე განმარტებით, ამ ეტაპზე გამგეობას მსგავსი დაავადების მქონე ერთმა პიროვნებამ მიმართა.

[თაკო ფეიქრიშვილი, ახალციხე]