ახალციხის გამგეობა შეჭირვებულ ოჯახებს სამშენებლო მასალებით აღარ დაეხმარება

ნორა ჩუტკერაშვილი ახალციხის მუნიციპალიტეტის სოფელ წინუბანში ცხოვრობს. ოჯახის დიასახლისი ამბობს, რომ მისი სახლი ავარიულია, მეორე სართულზე კედლებს ბზარები ყოველდღიურად ემატება. დაზიანებული კედელის შეკეთების საშუალება კი არ აქვს.

„გამგეობაში, მისაღებში მივედი, ვუთხარი, რომ განცხადების დაწერა მინდოდა, მაგრამ უარი მითხრეს, აღარ ვეხმარებით სამშენებლო მასალებითო“, – ამბობს ნორა.

მისი თქმით, ახალციხის მუნიციპალიტეტის გამგეობას გასულ კვირას მიმართა: „ავდექი და წამოვედი, აღარაფერი მითქვამს. დახმარება რამდენიმე წლის წინ მომიხსნეს. ოჯახში მარტო მეუღლე მუშაობს, მისი შემოსავალი ექვსსულიანი ოჯახის გამოსაკვებადაც არ არის საკმარისი“.

ახალციხის მუნიციპალიტეტის გამგეობაში დაგვიდასტურეს, რომ პროგრამა, რომლითაც სოციალურად დაუცველ ოჯახებს, დაზიანებული საცხოვრებელი სახლის შესაკეთებლად სამშენებლო მასლებით ეხმარებოდნენ, ნამდვილად აღარ აქვთ.

„შარშან დასრულდა ეს პროგრამა ამ კუთხით. გასულ წელს შემოსული განცხადებები რაც იყო, საჭიროებისამებრ ყველას დავეხმარეთ. წელს ახალი პროგრამები დავამატეთ, მაგალითად სიმსივნით დაავადებულების და უსახლკაროების დასახმარებლად, რომლის აუცილებლობაც დადგა“ , – ამბობს ახალციხის მუნიციპალიტეტის გამგებლის მოადგილე გურამ მელიქიძე.

მისი თქმით, ჩუტკერაშვილებს შეუძლიათ განცხადება მუნციპალიტეტის გამგებლის სახელზე მაინც დაწერონ. ამ შემთხვევაში სპეციალური კომისია ვითარებას შეისწავლის და თუ მდგომარეობა სავალალოა, აუცილებლად დაეხმარებიან.

გასულ წელს მუნიციპალიტეტის გამგეობა სამშენებლო მასალებით 160 ბენეფიციარს დაეხმარა, რისთვისაც ადგილობრივი ბიუჯეტიდან 38 485 ლარი დაიხარჯა.

[თინათინ ზაზაძე, ახალციხე]