ახალციხის ციხიდან თანამშრომლები გაათავისუფლეს

სამსახურიდან ის თანამშრომლები გაათავისუფლეს, რომლებსაც ციხის ადმინისტრაციასთან სამთვიანი ხელშეკრულებები ჰქონდათ გაფრომებული. ხუთ თანამშრომელს კი ხელფასები გაუნახევრდა, ახლა ისინი 240 ლარის ნაცვლად 120 ლარს მიიღებენ.

ადმინიტრაციაში ამბობენ, რომ თანამშრომელთა გათავისუფლება ბიუჯეტის შემცირების გამო გადაწყვიტეს. სეზონზე, ტურისტული ნაკადის გაზრდის შემთხვევაში, მათ ისევ დაუკავშირდებიან.

შეგახსენებთ, რომ 2012 წლის ადგილობრივი ბიუჯეტიდან ახალციხის ციხისთვის სუბსიდიის სახით 940,000 ლარი იყო გამოყოფილი. 2013 წლის ბიუჯეტში კი თანხა 400,000-მდე შემცირდა.

ციხის დირექტორი ბესიკ ბლიაძე ამბობს, რომ ის თანხა, რაც ციხისთვის არის გამოყოფილი, მიზერულია და კომუნალურ გადასახადებში არ ეყოფათ.

ციხის დირექციას გაზისა და ელექტროენერგიის გადასახების გადახდა იანვრის თვიდან თავად მოუწევს.

”გადასახდელი ქვითრები 11 იანვარს მოვიდა. დენში 21,099 ლარი უნდა გადავიხადოთ, გაზში კი 11,189 ლარი. ჩვენი ერთი თვის შემოსავალი დეკემბრის თვეში კი 8,825 ლარი იყო. ეს თანხა გადასახადებსა და ხელფასის გაცემას არ ეყოფა”,-განმარტავს ბლიაძე.

ადმინისტრაციაში ამბობენ, რომ ცდილობენ ტურისტების რაოდენობა გაზარდონ. ამ ეტაპზე მოლაპარაკებები მიმდინარეობს ორ რუსულ (რუსეთის) ტურისტულ კომპანიასთან, რომლებმაც თანამშრომლობის სურვილი თავად გამოთქვეს.

”ვაპირებთ ტურების მოწყობას. ვადგენთ მარშრუტებს. ტურისტს ახალციხის ციხის გარდა დავათვალიერებინებთ ვარძიას, საფარას და რეგიონის სხვა ღირშესანიშნავ ადგილებს. ტური ერთკვირიანი იქნება და ერთი კაცი დღეში (სასტუმროთი და კვებით) 150 ლარი ეღირება”, - გამნარტავს ბლიაძე.

[თინათინ ზაზაძე, ახალციხე]