საახალწლო გამოფენა სამხატვრო სკოლაში [Photo]

2015–2016 სასწავლო წლის პირველი სემესტრის შემაჯამებელი გამოფენა ახალციხის სამხატვრო სკოლაში დღეს, 25 დეკემბერს მოეწყო. მოსწავლეებმა სხვადასხვა თემაზე შექმნილი 200–მდე ნამუშევარი წარმოადგინეს.

"დარბაზის სიმცირის გამო ამ გამოფენაზე მხოლოდ 50–მდე მოსწავლის ნამუშევარი წარმოვადგინეთ, აქ არის სხვადასხვა თემატიკა, საახალწლო ნამუშევრები, ფერწერა, გრაფიკა, კომპოზიცია, კერამიკა, ვიტრაჟი, თიხაზე და მინაზე ნამუშევრები. ვფიქრობ, რომ ამ გამოფენით ბევრი რამე ვთქვით და გავახარეთ ბავშვები, მშობლები და ყველა ვინც ამ გამოფენაზე მოვიდა", – ამბობს ახალციხის სამხატვრო სკოლის ხელმძღვანელი ნანა ნათენაძე.

საახალწლო გამოფენას ახალციხის მერიის წარმომადგენლები ესწრებოდნენ.

ახალციხის სამხატვრო სკოლაში სწავლა ექვსწლიანია. ამჟამად სკოლაში 220 მოსწავლეა.




[თამარ თოთაძე, ახალციხე]