ახალციხის სამხატვრო სკოლაში სააღდგომო გამოფენა გაიმართა [ფოტო]

სამხატვრო სკოლის მოსწავლეები ფაიფურით, თიხითა და თექით ჯეჯილს, სააღდგომო კვერცხებსა და პასკას დაახლოებით ერთი თვის განმავლობაში ამზადებდნენ.

„ეს არის ტრადიციული სააღდგომო გამოფენა, სადაც წარმოდგენილია ასევე, ფერწერა და გრაფიკაც“, – გვითხრა ახალციხის სამხატვრო სკოლის დირექტორმა ნანა ნათენაძემ.

სამხატვრო სკოლის მოსწავლე ლელა კოჩალიძემ გამოფენისთვის პეიზაჟი დახატა, ნათია კეკიშვილმა კი ნატურმორტი.

„როცა ფუნჯს ავიღებ ხელში არ ვიცი რა მინდა რომ დავხატო, თუმცა შემდეგ ნელ–ნელა მოდის აზრები და ვიწყებ ხატვას. გააჩნია კიდევ ჩემს განწყობას, თუ კარგ ხასიათზე ვარ მალე ვხატავ და თან ღია ფერებში“, – ამბობს ლელა.

„ოთხი წლიდან ვხატავ, დედაჩემი ხატავს კარგად და ალბათ მისგან გამომდინარე შემიყვარდა ხატვა“, – გვიყვება ნათია.

ახალციხის სამხატვრო სკოლა გაზაფხულზე კიდევ ერთ გამოფენას მოაწყობს. სკოლის ადმინისტრაციაში აცხადებენ, რომ ყველა ნამუშავრის წარმოსადგენად სივრცე საკმარისი არაა და ამიტომ მათ ნაწილს მოგვიანებით გამოფენენ.

















[მარიამ ბარძიმაძე, ახალციხე]