საგაზაფხულო გამოფენა სამხატვრო სკოლაში [Photo]

120 მოსწავლის არაერთ ნამუშევარს შორის, ჯულიეტა გრიგორიანის სამი ნამუშევარი მოხვდა: „ჩემი ცხოვრებაა ხატვა, ერთი დღეც ვერ წარმომიდგენია, რომ რაიმე იდეა არ მომივიდეს. უმეტესად ძველი შენობების დახატვა მიყვარს, ახლაც თბილისის ერთ–ერთი ძველი ქუჩის ნახატის შექმნაზე ვმუშაობ“.

სამხატვრო სკოლის დირექტორი ნანა ნათენაძე ნამუშევრებს შორის ფაიფურისგან შექმნილ ნაკეთობებს გამოყოფს. ამბობს, რომ ამ მასალაზე მუშაობა ერთი წლის წინ დაიწყეს: „ფაიფურზე მუშაობა საკმაოდ რთულია, ამის უფლებას მხოლოდ მაღალი კლასის მოსწავლეებს ვაძლევთ, ოღონდ მასწავლებლების დახმარებით, რა თქმა უნდა“.

დირექტორი გვიხსნის, რომ ფაიფური რამდენიმე რთული და ფაქიზი სამუშაოს შესრულებას მოითხოვს. გაკეთებული მასა არც თხელი უნდა იყოს და არც სქელი, იმისთვის, რომ შექმნილი ნამუშევარი არ დაიბზაროს.

მისივე თქმით, ტრადიციული ნამუშევრების გარდა ბოლო პერიოდში სამკაულების გაკეთებაც დაიწყეს: „ვაკეთებთ საყურეებს, ბეჭდებს, ყელსაბამები, რომლებიც ძალიან ლამაზად და საინტერესოდაა მოხატული. ამ ბოლოს გაუჩნდათ ბავშვებს ინტერესი, რომ მსგავსი ხელნაკეთი აქსესუარებიც შექმნან“.

გამოფენა დღეს, 20 აპრილს, 13:00 საათზე გაიხსნა. დარბაზის სიმცირის გამო ნამუშევრებს ორ დღეში აიღებენ.







[მარიამ ბარძიმაძე, ახალციხე]