სააღდგომო გამოფენა ახალციხის სამხატვრო სკოლაში

ახალციხის სამხატვროს სკოლის მოსწავლეებმა დღეს, 27 აპრილს, გამოფენა გამართეს. სამხატვრო სკოლის 220–მდე მოსწავლიდან გამოფენაზე 80 მათგანის ნამუშევარი იყო წარმოდგენილი.

„სამხატვრო სკოლა ახალციხისთვის ძალიან მნიშვნელოვანია. ხელოვნება და მხატვრობა არის ის, რაც ადამიანებში კეთილშობილებას ბადებს“,– აღნიშნა ახალციხის მერმა გიორგი კოპაძემ, რომელმაც მოსწავლეების ნამუშევრები დაათვალიერა.

სკოლის მცირე საგამოფენო დარბაზის გამო სამხატვრო სკოლის მოსწავლეებმა გამოფენაზე ნამუშევრების მხოლოდ ნაწილი წარადგინეს. ახალციხის მერი გიორგი კოპაძე მოსწავლეებსა და სკოლის ხელმძღვანელობას დაჰპირდა, რომ სამხატვრო სკოლის გაფართოვებაზე იზრუნებს. გარდა ამისა, დღევანდელ გამოფენაზე კოპაძემ განაცხადა, რომ ახალციხეში საგამოფენო დარბაზის გახსნა იგეგმება.

„წელს პირველად ზეთზე შესრულებული ნამუშევრები გვქონდა წარმოდგენილი, ასევე თექაზე შესრულებული კერამიკა, რომელიც ძალიან უცხოა. სამწუხაროდ დარბაზის სიმცირის გამო სკოლის 220 მოსწავლიდან გამოფენაში მონაწილეობა მხოლოდ 80–მათგანის ნამუშევარმა მიიღო“,– განაცხადა ახალციხის სამხატვრო სკოლის დირექტორმა ნანა ნათენაძემ.

ახალციხის სამხატვრო სკოლამ წლევანდელ წელს უკვე მეოთხე გამოფენა გამართა. სკოლის დირექტორი ამბობს, რომ გამოფენები მომავალშიც გაიმართება.

[ვარლამ წიკლაური, ახალციხე]