ახალციხის სამხატვრო სკოლის პედაგოგების პირველი გამოფენა

დღეს, 12 სექტემბერს ახალციხის სამხატვრო სკოლის პედაგოგების ნამუშევრების პირველი გამოფენა გაიმართა. ფერწერა, თექა, კერამიკა, გობელენი, კოლაჟი და ვიტრაჟი სამხატვრო სკოლის დირექტორმა ნანა ნათენაძემ, პედაგოგებმა ლალი კურტანძემ, ხათუნა მაღრაძემ და მარიამ ჩახმახჩიანმა გამოფინეს. „ახალციხის ციხის“ ციტადელზე მათი ნამუშევრების გვერდით ადგილი სამხატვრო სკოლის კურსდამთავრებულის, ნათია მაჭავარიანის ნახატებსაც დაეთმო.

„ნათია ლალი კურტანიძის შვილია, ეს გაკრვეულ წილად დედა–შვილის გამოფენაცაა“, – ამბობს სამხატვრო სკოლის დირექტორი ნანა ნათენაძე.

ნათია მაჭავარიანი ამბობს, რომ ბავშვობიდან ხატავს, ბოლო დროს კი აბსტრაქტულმა სტილმა გაიტაცა. მისი თქმით, გამოფენაზე გამოტანილი ნამუშევრების ნაწილი დედასთან ერთადაა შესრულებული, ნაწილზე კი დამოუკიდებლად იმუშავა: „ჩემთვის ეს პირველი გამოფენაა და პერსონალურ გამოფენასაც აუცილბელად მოვაწყობ“.



რიგით მესამე გამოფენაა ლალი კურტანიძისთვის: „ვფიქრობ, რომ აქ გამოფენილ ყველა ნამუშევარს თავისი ხიბლი აქვს, ყველა ჩემი სულის ნაწილია. თითქმის ყველა ნამუშევარი სახლში გავაკეთე“.

სახლში, სამუშაო საათების შემდეგ, სხვადასხვა დროს გააკეთა თექის ნამუშევრები, ხათუნა მაღრაძემაც: „ყველას რომ მივაძინებ ოჯახში, მერე ვმუშაობ–ხოლმე. განსაკუთრებით თექაზე შერულებული ლუარსაბისა და დარეჯანის კომპოზიცია მიყვარს, ის ზუსტად ისეთი და კიდევ უფრო კარგი გამომივიდა, როგორსაც ვფიქრობდი. ოღონდ ახლა ეს კომპოზიცია თბილისში სხვა გამოფენაზეა“.



სამი ნამუშევარი გამოიტანე გამოფენაზე მარია ჩახმახჩიანმა: „სამივე პეიზაჟია. მეხუთე წელია რაც სამხატვრო სკოლაში ვმუშაობ და ეს ჩემი პირველი გამოფენაა“.

გამოფენის გახსნას ციტადელზე ახალციხის მერიისა და საკრებულოს ასევე ახალციხი ციხის თანამშრომლები ესწრებოდნენ.

„კარგი იქნება თუ ამ დარბაზში ჩანაწერების წიგნი იქნება, რომელშიც ნამუშევრების ავტორებიცა და დამთვალიერებლებიც შთაბეჭდილებებს დაწერენ. ეს ისტორია იქნება, რომელიც ამ ქალაქს დარჩება“, – განაცხადა ახალციხის მერმა ვლადიმერ ზედგინიძე.



[თამუნა უჩიძე, ახალციხე]