რას აღიარებს წარდგენილ ბრალში შალვა აბულაძე

შალვა აბულაძის ადვოკატი, რომელიც ბოლო პროცესებზე სხდომებს აღარ ესწრებოდა, ამბობს, რომ მისი დაცვის ქვეშ მყოფი წარდგენილი სხვადასხვა ეპიზოდებიდან მხოლოდ ერთს, მაყუჩიანი იარაღის, ასევე მაკაროვის ტყვიების უკანონო შეძენა–შენახვა–ტარებას აღიარებს. რაც შეეხება გლოკის ტიპის იარაღს, ასევე პოლიციელების მკვლელობას, კატეგორიულად უარყოფს.

„სასამართლოს არ აქვს არცერთი უტყუარი მტკიცებულება, რომელიც აბულაძის დანაშაულს დაადასტურებს. რომც თქვას შალვამ ვაღიარებ დანაშაულსო რითი უმტკიცებენ?! ამ საქმეს ვანო მერაბიშვილის ხელის ბიჭი იხილავდა და თავიდანვე ვამბობდი, რომ აბულაძეს სამუდამოს მისცემდნენ, ეს არც გამკვირვებია“, – ამბობს შალვა ხაჭაპურიძე.

მისი თქმით, განსაკუთრებით ბორჯომის ეპიზოდში შეუძლებელია პოლიცილის მკვლეობაში აბულაძის დადანაშაულება: „სასამართლო სამედიცინო ექსპერტიზამ ვერ დაადგინა სიკვდილის მიზეზი. ის კაცი ექიმებმა მოკლეს და არა აბულძემ“.

ხაჭაპურიძე აცხადებს, რომ განაჩენს აუცილებლად გაასაჩივრებენ. უფრო მეტიც ამ საქმეს სტრასბურგში წაიღებს.

რაც შეეხება იმას, რომ მას აბუალძე უნდობლობას უცხადებდა და სწორედ ეს იყო მიზეზი, რის გამოც ბოლო დროს სხდომებს არ ესწრებოდა, ამბობს რომ სიცრუეა: „განცხადება აბულაძის მიერ იმის შესახებ, რომ მე არ მენდობა განგებ დაიწერა. ეს იყო ერთადერთი გზა რაც მე კანონით მომცემდა უფლებას, რომ პროცესებს აღარ დავსწრებოდი. პროტესტის გამო რომ პროცესს არ დავეწსრო ამის უფლება არ მაქვს. ჩვეულებრივ ვაგრძელებ ამ საქმეზე მუშაობას. ხვალ აბუალძესაც შევხვდები“, – ამბობს ხაჭაპურიძე.

შეგახსენებთ, დღეს პოლიციელების მკვლელობაში ბრლადებულ შალვა აბუალძეს ახალციხის რაიონულმა სასამართლომ სამუდამო პატიმრობა მიუსაჯა.

[თამუნა უჩიძე, ახალციხე]