შალვა აბულაძეს სახაზინო ადვოკატი დაენიშნება

დღეს, 6 ოქტომბერს, პოლიციელების მკვლელობაში ბრალდებულ შალვა აბულაძის სხდომაზე თავად ბრალდებული არ გამოცხადდა. პროცესზე დასწრებაზე რომ უარს აცხადებს, ამის შესახებ ახალციხის რაიონულ სასამართლოს მეშვიდე საპყრობილედან წერილობით აცნობეს.
პროცესზე არც ბრალდებულის ინტერესების დამცველი შალვა ხაჭაპურიძე გამოცხადდა.

„როგორც თანაშემწემ გაარკვია შეუძლოდ ყოფილა, არ ვიცით რამდენად საპატიოა ეს მიზეზი, ალბათ შესაბამის დოკუმენტს წარმოადგენს“, – განაცხადა პროცესზე მოსამართლე გოჩა ჯეირანაშვილმა.

როგორც სხდომაზე პროკურორმა დავით მეფარიძემ განაცხადა, მას დღეს დასაკითხად წარმოდგენილი 7 მოწმე ჰყავდა, თუმცა იმის გამო, რომ საქმე დაცვას ექვემდებარება, ვერცერთს ვერ დაკითხავენ.

იმის გამო, რომ მომავალში პროცესი არ გაჭიანურდეს, მომავალი სხდომიდან აბულაძის საქმეში, მოსამართლის გადაწყვეტილებით, სახაზინო ადვოკატები ჩაერთვებიან.

როგორც პროცესის დასრულების შემდეგ პროკურორმა განაცხადა, დღეს მოწმეები როგორც თბილისში, ასევე, ბორჯომში მომხდარი მკვლელობის შესახებ უნდა დაკითხულიყვნენ.

საქმეზე დასაკითხ მოწმეთა სია 200–ს სცილდება, თუმცა როგორც პროკურორი ამბობს, მათ შორის მხოლოდ ნაწილი დაიკთხება: „მიზანშეწონილად რამდენსაც ჩავთვლით, იმდენს დავკითხავთ“.

შეგახსენებთ, რომ შალვა აბულაძეს ბრალად ედება: პოლიციელის სიცოცხლის მოსპობა პოლიციელის სამსახურებრივ საქმიანობასთან დაკავშირებით (2 ეპიზოდი), პოლიციელის სიცოცხლის მოსპობის მცდელობა პოლიციელის სამსახურებრივ საქმიანობასთან დაკავშირებით (2 ეპიზოდი) ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება და ცეცხლსასროლი იარაღის მართლსაწინააღმდეგოდ შეძენა, შენახვა.

2015 წლის 11 აპრილს, თბილისის საქალაქო სასამართლომ განიხილა და დააკმაყოფილა ქ.თბილისის პროკურატურის შუამდგომლობა, ახალციხის რაიონული სასამართლოს 2015 წლის 2 თებერვლის განჩინებით ბრალდებულ შალვა აბულაძის მიმართ აღკვეთის ღონისძიების სახედ შეფარდებული პატიმრობის ძალაში დატოვების თაობაზე.

[თამუნა უჩიძე, ახალციხე]