შალვა აბულაძის კვების საკითხით გედევან ფოფხაძე დაინტერესდება

პოლიციელების მკვლელობაში ბრალდებული შალვა აბულაძე სასამართლოში, მის საქმეზე მიმდინარე პროცესებს აღარ ესწრება. ბრალდებულის გარეშე უკვე სამი პროცესი გაიმართა. აბულაძე აცხადებს, რომ მგზავრობის დროს და სასამართლოში საჭმელს არ აჭმევენ და ჯანმრთელობის პრობლემები ექმნება.

„დღემდე უკანონოა და დაუსაბუთებელი 6–თვიანი წამება. ვინაიდან სასამართლო დაშორებულია საპატიმრო დაწესებულებას, თბილისიდან ახალციხემდე და მანდ, პროცესზე დასწრებას 12 საათი სჭირდება, მე ამ დროის განმავლობაში მშიერი ვარ. ეს შიმშილი ჩემზე ძალიან მოქმედებს, ბოლო პროცესზე რომ ვიყავი, ციხისგან მოვითხოვე კვება, თუმცა უარი მივიღე. 12–საათიანი შიმშილი არ მაძლევს საშუალებას, რომ პროცესს დავესწრო. თუ არ მომცემენ საჭმელს, იგივე განმეორდება შემდეგ პროცესზეც“, – ნათქვამი იყო შალვა აბულაძის წერილში, რომელიც მისმა ადვოკატმა 1 ოქტომბერს გამართულ პროცესზე წაიკითხა. მას შემდეგ ორი პროცესი გაიმართა და აბულაძე არცერთს აღარ დასწრებია.

ადამიანის უფლებათა დაცვისა და სამოქალაქო კომიტეტის თავმჯდომარე, ბორჯომის მაჟორიტარი დეპუტატი გედევან ფოფხაძე ამბობს, რომ ამ საკითხთან დაკავშირებით საქმის კურსში არაა, თუმცა აუცილებლად დაინტერესდება.

„გამორიცხულია, რომ მას საკვებს არ აძლევენ. ეგ თვითონ ამბობს საკვებზე უარს, აუცილებლად ჩავერევი ამ საკითხში, შალვა ჩემთვის უცხო არაა, ბავშვობიდან ვიცნობ. დანაშაული ჩაიდინა თუ არ ჩაიდინა, ადამიანი საპატიმროში უზრუნველყოფილი უნდა იყოს. აუცილებლად დავინტერესდები ამ საკითხით და გადავამოწმებ“, – ამბობს გედევან ფოფხაძე.

შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

[ვარლამ წიკლაური, ბორჯომი]